ފަލަސްތީނުގެ ޣައްޒާގެ ޚާންޔޫނިސް އަށް އިޒްރާއިލުން ދިން ވަރުގަދަ ބޮމުގެ ހަމަލާތަކުގައި މުޅި ސަރަހައްދު ފުނޑުފުނޑުވެ، އެތައް ބަޔަކު ޝަހީދުވެއްޖެއެވެ.

އަލްޖަޒީރާގައި ބުނެފައިވަނީ ޚާންޔޫނިސް އަށް ދިން ހަމަލާތަކުގެ ސަބަބުން ގިނަ ބަޔަކު ޝަހީދުވެފައި ވާ ކަމަށާއި އެތައް އިމާރާތެއް ހަލާޚުވެފައި ކަމަށެވެ. އަދި ޝަހީދުވި މީހުންގެ ސީދާ ޢަދަދެއް ސާފުވެފައި ނުވާ ކަމަށްވެސް ބުނެފައިވެއެވެ.

ޚާންޔޫނިސް އަށް ދިން ހަމަލާތަކުގައި ޝަހީދުވި މީހެއްގެ ހަށިގަނޑު. ފޮޓޯ: އަލްޖަޒީރާ

ޚާންޔޫނިސް އަކީ ޣައްޒާގެ އުތުރުން ހަނގުރާމައިގެ ސަބަބުން ގެދޮރު ގެއްލުމާއި ސަލާމަތް ތެރިކަން ހޯދުމަށް ޓަކައި އެސަރަހައްދުގެ 430،000 މީހުން ވަގުތީ ހިޔާވަހިކަން ހޯދަމުން ދިޔަ ސަރަހައްދެކެވެ.

އިޒްރާއިލްގެ ސިފައިން ވަނީ ޣައްޒާގެ ދެކުނުގައި އެމީހުންގެ މިލިޓަރީ އޮޕަރޭޝަންތައް ފުޅާކުރާނެ ކަމަށް ބުނެފައެވެ. ޣައްޒާގެ އަލް ޝުޖައިޔާ އަދި އަލް ތުއްފާހް ނެއިބަރހުޑްގައި އިޒްރާއިލް ސިފައިން މިލިޓަރީ ރެއިޑް ތަކެއް ހިންގައި ބަޑި ޖެހުން ކުރިއަށް ގެންގޮސްފައިވެއެވެ.

އަލްޖަޒީރާގައި ބުނެފައިވަނީ ކުރިއަށް އޮތް ދުވަސް ތަކުގައި އިޒްރާއިލްގެ ހަމަލާ ތަކުގެ މައިގަނޑު އަމާޒަކަށް ޚާންޔޫނިސް ހަދާނެ ކަމުގެ އިންޒާރު ދީފައިވާކަމަށެވެ.