ފެނަކައިގެ ހުރިހާ މުވައްޒަފުންގެ ކުށުގެ ރެކޯޑް ސާފުކުރުމަށް އެއްފަހަރަ ހުށަހެޅުމުން، ކުށުގެ ރިކޯޑް ސާފުކުރަމުން އައި ގޮތަށް ޕީޖީ އޮފީހުން ވަގުތީގޮތުން ބަދަލު ގެނެސްފިއެވެ. 

ޕްރޮސިކިއުޓަރ ޖެނެރަލް އޮފީހުން މިއަދު ބުނީ، އެ އޮފީހުގެ ކުށުގެ ރެކޯޑު ސާފުކުރުމަށް އެދި، އޮންލައިންކޮށް ހުށަހަޅާ މައްސަލަތަކުގައި ޢާންމުގޮތެއްގައި އެއް ދުވަހުގެ ތެރޭގައި ރިކޯޑް ސާފުކޮށްދޭ ކަމަށެވެ.

ނަމަވެސް، ސަރުކާރު ޙިއްސާވާ ކުންފުންޏެއްގެ ހުރިހާ މުވައްޒަފުންގެ ކުށުގެ ރެކޯޑު ސާފުކުރުމަށް އެދި ހުށަހެޅުމުން، އެނިޒާމު މިވަގުތު ތޮއްޖެހިފައިވާ ކަމަށާ އެކަމުގެ ސަބަބުން އެއޮފީހުން ފޯރުކޮށްދޭ އެހެން ޚިދުމަތްތަކަށްވެސް އިއްޔެ ބުރޫއަރާފައިވާ ކަމަށް ޕީޖީ އޮފީހުން ބުނެފައިވެއެވެ. 

ޕީޖީ އޮފީހުން އިތުރަށް ބުނީ، ޢާންމު ގޮތެއްގައި އަހަރަކު، ޕީޖީ އޮފީހުން ކުށުގެ ރެކޯޑު ސާފުކޮށްދެނީ ޖުމްލަ 13 ހާހެއްހައި ފޯމު ކަމަށާ، އިއްޔެ އެކަނި މިއޮފީހުން 3930 ފޯމު ލިބުނު ކަމަށެވެ. އަދި އެއީ ގާތްގަނޑަކަށް އަހަރަކު އަންނަނާނެކަމަށް އަންދާޒާކުރާ ފޯމުގެ %30 ޕަސެންޓު ފޯމު ކަމަށްވެސް ބުނެފައިވެއެވެ. 

ޕީޖީ އޮފީހުން ބުނީ، އިއްޔެ ހުށަހެޅުނު ފޯމުތަކުގެ ތެރެއިން 3419 ފޯމުގެ ރެކޯޑު ސާފުކޮށްދެވިފައިވާ ކަމަށާ، ނަމަވެސް، އެއީ، ރޭގަނޑާ ހަމައަށް މަސައްކަތްކޮށްގެން ނިމުނު މިންވަރު ކަމަށެވެ.

އެފަދައިން ކަން ކުރުމަކީ ދެމެހެއްޓެނިވި ކަމަކަށް ނުވާތީ، މިދުވަސްކޮޅު ރެކޯޑު ސާފުކޮށްދިނުން ހިނގާނީ ރަސްމީ މަސައްކަތު ވަގުތަގައި އެކަނިކަމުގައި ޕީޖީ އޮފީހުން ހަމަޖައްސާފައިވާ ކަމަށް އެ އޮފީހުން ވަނީ ބުނެފައެވެ. އެގޮތުން ކޮންމެ ދުވަހަކުވެސް ރަސްމީ ވަގުތު ނިމެންދެން އެދުވަހަކަށް ސާފުކޮށްދެވުނު ވަރަކަށް ސާފުކޮށްދޭނެ ކަމަށާ އެއަށްފަހު ޖެހިގެން އަންނަ ދުވަހު އަނެއްކާވެސް އެ މަސައްކަތް ފަށާނެ ކަމަށް ބުނެފައިވެއެވެ. 

މިއާއެކު ޕީޖީ އޮފީހުން ބުނީ، މިހާރު ހުށަހެޅިފައިވާ ފޯމުތައް ކުޑައަޑިވުމުން، ކުރިންވެސް ޚިދުމަތް ދެމުން ގެންދިޔަގޮތަށް ދުވަހުން ދުވަހަށް ފޯމުތައް ސާފުކޮށްދެމުން ގެންދާނެ ކަމަށެވެ.

ޕީޖީ އޮފީހުން ވަނީ، ކުށުގެ ރިކޯޑު ސާފުކުރުން ވަގުތީގޮތުން ލަސްވާތީ ޢާންމުންގެ ކިބައިން މަޢާފަށް އެދިފައެވެ.