ކ މާފުށީ ބޭރުގައި އޮތް ސަފާރީއެއް ބަލައި ފާސްކޮށް ބަނގުރާލާއި އެކު ބަޔަކު ހައްޔަރުކޮށްފި ކަމަށް ދިވެހި ފުލުހުން ބުނެފިއެވެ.

ފުލުހުން ބުނެފައިވަނީ ކ. މާފުށީ ބޭރުގައި އޮތް ސަފާރީއެއްގައި ބަނގުރަލުގެ ވިޔަފާރިކުރާކަމަށް ފުލުހުންނަށް ލިބުނު މަޢުލޫމާތަކާ ގުޅިގެން ހިންގި އޮޕަރޭޝަނެއް ހިންގައި، ސަފާރީއެއް ބަލައިފާސްކޮށް، ގިނަ އަދަދެއްގެ ބަނގުރަލާއެކު ތިން މީހަކު ހައްޔަރުކޮށްފައި ވާކަމަށެވެެ.

ޕޮލިހުން ބުނެފައިވަނީ މިދިޔަ ނޮވެމްބަރު މަހުގެ 30 ވަނަ ދުވަހު ޑްރަގް އެންފޯސްމަންޓް ޑިޕާޓްމަންޓާއި މާފުށި ޕޮލިސް ސްޓޭޝަން އަދި ކަސްޓަމްސް ސަރވިސް ގުޅިގެން ހިންގި މި އޮޕަރޭޝަނުގައި ތިން މީހަކު ހައްޔަރުކޮށްފައި ވާ ކަމަށެވެ.

Advertisement

އަދި މިމައްސަލާގައި ހައްޔަރުކޮށްފައިވަނީ 21 އަހަރުގެ ދިވެހި ފިރިހެނަކާއި 22 އަހަރުގެ ދިވެހި ފިރިހެނަކާއި 53 އަހަރުގެ ބިދޭސީ ފިރިހެނެއް ކަމަށް ފުލުހުން ބުނެފައިވެއެވެ.

މި އޮޕަރޭޝަނުގައި އެ ސަފާރީ ބަލައިފާސްކޮށް، 237 ފުޅި ބަނގުރަލާއި 309 ބިޔަރު ދަޅު ފުލުހުންގެ ބެލުމުގެ ދަށަށްވަނީ ގެނެސްފައެވެ.

މި މައްސަލައާ ގުޅިގެން ހައްޔަރުކޮށްފައިވާ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުންވަނީ 21 އަހަރުގެ މީހާއަށް 7 ދުވަސް، 22 އަހަރުގެ މީހާއަށް 13 ދުވަސް އަދި 53 އަހަރުގެ މީހާއަށް 15 ދުވަހުގެ މުއްދަތެއް ޖަހައިފައިވާކަމަށްވެސް ފުލުހުން ބުނެފައިވެއެވެ.

މިމައްސަލަ ޑްރަގް އެންފޯސްމަންޓް ޑިޕާޓްމަންޓުން ދަނީ ތަހިޤީޤް ކުރަމުން ކަމަށް ފުލުހުން ބުނެއެވެ.