ޖާމިޢަތުލް އަޒްހަރުގައި ކިޔަވާ ފަލަސްޠީނުގެ ދަރިވަރުންނަށް ކިޔެވުމުގެ ފީ މަޢާފްކޮށްދިނުމާއި އެކޮމަޑޭޝަން ހިލޭ ހަމަޖައްސައިދިނުމަށް ޝައިޚުލް އަޒްހަރު ޑރ އަޙްމަދު އަލް ޠައްޔިބް ގޮވައިލައްވައިފިއެވެ.

މިދިޔަ ހޮނިހިރު ދުވަހު ޝައިޚުލް އަޒްހަރް ޢާންމު ކުރެއްވެވި ބަޔާނެއްގައި ވިދާޅުވެފައިވަނީ ވީއެންމެ އަވަހަކަށް އަލް އަޒްހަރުގައި ކިޔަވާ ފަލަސްޠީނުގެ ދަރިވަރުންގެ ކިޔެވުމުގެ ފީ މަޢާފްކޮށްދީ އެދަރިވަރުންނަށް މިޞްރުގެ ޤާހިރާ ގެ އިސްލާމިކް ބާތް ސިޓީ އިން އެދަރިވަރުނަށް ހިލޭ އެކޮމަޑޭޝަން ހަމަޖައްސައި ދިނުމަށެވެ.

އަލް އަޒްހަރުގައި މިވަގުތު ފަލަސްޠީނުގެ 444 ދަރިވަރަކު ދަނީ ކިޔަވަމުންނެވެ. އަދި އަލަށް 75 ދަރިވަރަކު ވަނީ ސްކޮލަރޝިޕް ތަކަށް އެޕްލައި ކޮށްފައެވެ.

Advertisement

ފަލަސްޠީނުގެ ޣައްޒާގައި އިޒްރާއިލްގެ ހައްދުފަހަނަ އެޅި ޔަހޫދީން ހިންގަމުންދާ ޖަރީމާތަކުގައި ޣައްޒާގެ އެތައް ބަޔަކު ވަނީ ޝަހީދުވެގެން ގޮސްފައެވެ. އަދި އެތައް ބަޔަކު ވަނީ ޒަޚަމްވެފައެވެ.

ޒަޚަމްވެ އެކަށީގެންވާ ފަރުވާ ނުދެވި ތިބި ބައެއް މީހުން ވަނީ ފަލަސްޠީނާއި މިޞްރު ގުޅޭ ރަފާޙް ބޯޑަރު ހުރަސްކޮށް މިޞްރަށް ގެންގޮސްފައެވެ.

ޖާމިޢަތުިލް އަޒްހަރަކީ ދުނިޔޭގެ އެންމެ ގިނަ ދުވަސްވީ އެއް ޖާމިޢާއެވެ. އެތަނަކީ ދީނީ އިލްމާއި، ބޭސްވެރިކަމާއި، ވިޔަފާރީގެ ޢިލްމާއި މިފަދަ އެތައް ޢިލްމެއް ފެތުރުމަށް މަސައްކަތް ކުރަމުންދާ ޖާމިޢާއެކެވެ. އިސްލާމީ އެތައް ޤައުމެއްގެ ދަރިވަރުން ދަނީ އަލް އަޒްހަރުން ތައުލީމު ހާސިލް ކުރަމުންނެވެ.