ހުޅުމާލޭގައި އިމާރާތް ކޮށްފައިވާ "ކޭ ޕާކް ރެޒިޑެންސް" ފްލެޓްތަކެއް އޮޅުވާލައިގެން ވިއްކުމަށްފަހު ހަންބޯ ކޮމްޕެނީ ޕްރައިވެޓް ލިމިޑެޓުގެ މައިނޯރިޓީ ހިއްސާދާރު ހަސަން މަމްދޫހު (މަންޑޭ) ހޯދާފައި ހުރި އަގު ބޮޑު މުދާތައް ހޯދުމަށް އޭނާ ހައި ކޯޓަށް ހުށައެޅި މައްސަލަ ބަލައިނުގަތުމަށް އެކޯޓުން ނިންމައިފިއެވެ.

ހައި ކޯޓުގެ ރަޖިސްޓްރާ ގެ ނިންމުމުގައި ވަނީ މަމްދޫހުގެ ފަރާތުން އެއްވެސް ގާނޫނަކާއި ނުވަތަ ގާނޫނީ އުސޫލަކާ ހަވާލާ ދީފައިނުވާތީ އާއި އިސްތިއުނާފް ކުރެވޭ މައްސަލަ އަކީ މަނީ ލޯންޑްރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ 51 ވަނަ މާއްދާގެ ދަށުން ނެރެފައިވާ އަމުރަކަށް ވާއިރު އެ މާއްދާގެ ދަށުން ނެރޭ އަމުރަކަށް ބުނެވުނު ސުޕްރިމް ކޯޓުގެ ގަޟިއްޔާ ޠަޠުބީގު ކުރެވޭ ގޮތެއް ސާފު ކޮށްދީފައި ނުވާތީ އެ މައްސަލަ ބަލައިގަނެވެން ނެތްކަމަށެވެ.

ހައި ކޯޓުން މިފަދައިން ނިންމާފާއިވަނިީ ދިވެހި ރާއްޖޭގެ ކޯޓުތަކުގެ ގާނޫނު ގައިވާ 43 ވަނަ މާއްދާ އާއި ހަވާލާ ދީއެވެ. މި މާއްދާ ގައި ދަށު ކޯޓުތަކާއި ޓްރައިބިއުނަލްތަކުގެ ނިންމުންތައް އިސްތިއުނާފުކުރެވޭނެ ދެ ހާލަތެއް އެ މާއްދާގައި ބަޔާންކޮށްފައިވެ އެެވެ.

މީގެ ތެރެއިން ފުރަތަމަ ހާލަތަކީ, އިސްތިއުނާފުކުރަން ހުށަހަޅާ ހުކުމް ނުވަތަ ނިންމުން ބިނާކުރެވިފައިވަނީ ގާނޫނާ ހިލާފަށް ކަމަށް ގަބޫލުކުރެވޭނެ ސަބަބުތަކެއް ހުރުން ނުވަތަ ގާނޫނު ތަތުބީގުކުރުމުގައި ނުވަތަ ގާނޫނު މާނަކުރުމުގައި ކުށެއް ހެދިފައިވާ ކަމަށް ގަބޫލުކުރެވޭނެ ކަންކަން ހުރުމެވެ. އަދި ދެވަނަ ހާލަތަކީ, ހުކުމުގެ ނުވަތަ ނިންމުމުގެ ކުރިއަށް އައި އިޖުރާއަތެއްގައި ހިމެނޭ ބާވަތްތަކުންކުރެ ބާވަތެއްގެ އައިބެއްގެ ސަބަބުން އެ ހުކުމަށް ނުވަތަ ނިންމުމަށް އަސަރު ފޯރުވި އިޖުރާއަތަކީ ބާޠިލު އިޖުރާއަތެއް ކަމުގައި ވުމެވެ.

ނޮވެންބަރު މަހުގެ 18 ވަނަ ދުވަހު މަންޑޭ ދިރިއުޅެމުންދިޔަ އެޕާޓްމެންޓް އަށް ފުލުހުން ވަދެ ފާސް ކުރީ ހުޅުމާލެ މެޖިސްޓްރޭޓް ކޯޓުން އަމުރެއް ހޯދައިގެންނެވެ. އެ އެޕާޓްމެންޓުން ފެނުނު އަގުބޮޑު މުދާތައް ފުލުހުންގެ ބެލުމުގެދަށަށް ގެންދިޔުމުގެ ސަބަބުން މިދިޔަ މަހުގެ 24 ގައި މަންޑޭ ވަނީ އެމައްސަލަ ކޯޓަށް ހުށައަޅާފައެވެ.

އެ އެޕާޓްމަންޓުން ފެނުނު އެތައް މިލިއަން ރުފިޔާގެ އަގު ބޮޑު ތަކެތީގެ ފޮޓޯތަކަކާއި އެކު މަންޑޭގެ މި ދިރިއުޅުމުގެ ވާހަކަތަކެއް ޕީޖީ އޮފީހުން މިދިޔަ މަހުގެ 30 ގައި ބޭއްވި ނޫސްވެރިންގެ ބައްދަލުވުމުގައި ވަނީ ހިއްސާ ކޮށްފައެވެ. މަންޑޭގެ މައްޗަށް 200 އަށްވުރެ ގިނަ ދައުވާ ކުރުމަށް ވަރަށް އަވަހަށް ފޮނުވާނެ ކަމަށް އެ އޮފީހުން ވަނީ ބުނެފަ އެވެ.