މަސްވެރިކަމުގެ ސިނާއަތުގައި ހުރި ވަޒީފާގެ ފުރުސަތުތަކާއި، ތައުލީމާއި ތަމްރީނުގެ ފުރުސަތުތަކާ ގުޅޭ ގޮތުން ކެރިއަރ ގައިޑެންސް ޕްރޮގްރާމެެއް ސްކޫލް ދަރިވަރުންނަށް ހާއްސަކޮށްގެން މޯލްޑިވްސް މެރިން ރިސާޗް އިންސްޓިޓިއުޓް (އެމްއެމްއާރުއައި)ން ބާއްވައިފިއެވެ.

މިކަމާއި ބެހޭގޮތުން އެމްއެމްއާރުއައި އިން ކުރި ޕޯސްޓެއްގައި ވަނީ މި ހަރަކާތް ކުރިއަށް ގެންދަނީ 43 ވަނަ މަސްވެރިންގެ ދުވަސް ފާހަގަ ކުރުމުގެ ގޮތުން ކުރިއަށް ގެންދިއުމަށް ހަމަޖެހިފައިވާ ހަރަކާތް ތަކުގެ ތެރެއިން ކަމަށެވެ.

ކެރިއަރ ގައިޑެންސް ޕްރޮގްރާމް އެމްއެމްއާރުއައި އިން ކުރިއަށް ގެންގޮސްފައިވަނީ ޖަމާލުއްދީން ސްކޫލްގެ ދަރިވަރުންނަށެވެ. މި ޕްރޮގްރާމް ގައި ދަރިވަރުންނަށް މައުލޫމާތު ދިނުމުގައި އެ އިންސްޓިޓިއުޓްގެ ޓީމަކުން ވަނީ ބައިވެރި ވެފައެވެ.

Advertisement

މި އަހަރުގެ މަސްވެރިންގެ ދުވަސް މާލޭގައި ބޭއްވުމަށް ހަމަޖެހިފައި ވާއިރު،މަސްވެރިންގެ ދުވަހާ ގުޅުވައިގެން ތަފާތު ޙަރަކާތްތަކެއް ކުރިއަށް ގެންދިއުމަށް މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ދަނީ ރާވަމުންނެވެ.

މީގެ ތެރޭގައި އެމިނިސްޓްރީން ދޭ ކެޔޮޅުންގެ އެވޯޑްވެސް ހިމެނެއެވެ. މިދިޔަ މަހުގެ 21 ގައި މި އެވޯޑަށް ކުރިމަތިލުމުގެ ފުރުސަތު ހުޅުވާލައިފައިވެއެވެ. މިހާރުވެސް މަސްވެރިކަމުގައި ޢަމަލީގޮތުން އުޅޭ، އަދި މަސްވެރިކަން ފިޔަވައި، އާމްދަނީ ހޯދުމަށް އެހެން މަސައްކަތެއް ނުކުރާ، އެންމެ ޚިދުމަތްތެރި ޒުވާން (35 އަހަރުން ދަށް) ކެޔޮޅަކާއި އެންމެ ތަޖުރިބާކާރު (35 އަހަރުން މަތި) ކެޔޮޅު ހޮވައި، އެ ދެފަރާތުގެ އަގު ވަޒަން ކުރުމުގެ ގޮތުން އެވޯޑެއް ދޭން މިނިސްޓްރީން ވަނީ ނިންމާފައެެވެ.