އދ ދިގުރަށު ކުނި ގޮނޑުގައި އެއްލައިލައިފައި އޮތް ކުއްޖާގެ މަންމަ ކަމަށް ބެލެވޭ މީހާ ޝަރީޢަތް ނިމެންދެން ބަންދުގައި ބެހެއްޓުމަށް ޙުކުމް ކޮށްފިއެވެ.

މިމައްސަލައާއި ގުޅިގެން ފުލުހުން ބުނެފައިވަނީ އދ. ދިގުރަށުގައި ވިހެއުމަށްފަހު ކޮތަޅަކަށް ލައި އެއްލާލާފައި އޮތް ތުއްތު ކުއްޖަކު އެރަށު ކުނިގޮނޑުން ފެނިފައިވާކަމަށެވެ. އަދި ފުލުހުންގެ މީޑިއާ އޮފިޝަލް ވިދާޅުވީ އެ މަޢުލޫމާތު އެ އިދާރާއަށް ލިބުނީ އިއްޔެ ހެނދުނު 09:20 އެހާކަންހާއިރު ކަމަށެވެ.

އެ މައްސަލައާ ގުޅިގެން ފުލުހުންގެ ޓީމެއް އެރަށުގައި ވަނީ ހަރަކާތްތެރިވެފައެވެ.

މީގެ އިތުރުން ފުލުހުންގެ މީޑިއާ އޮފިޝަލް އިއްޔެ ވިދާޅުވެފައިވަނީ ގޮނޑުން ފެނިގެން ނަގައިގެން ގެންދިޔަ އިރުވެސް އެ ކުއްޖާ ނިޔާވެފައިވާ ކަމަށް ކުއްޖާ ބެއްލެއްވި ޑޮކްޓަރު ފުލުހުންނަށް މައުލޫމާތު ދީފައިވާ ކަމަށެވެ.

މިކަމާއި ގުޅިގެން “ވޮއިސް” އަށް މަޢުލޫމާތު ދިން ދިން މީހަކު ބުނެފައިވަނީ، ފެނުނު ކުއްޖާ އަކީ ވޯކް ޕާމިޓް ވިސާގައި އެ ރަށުގައި މަސައްކަތް ކުރަމުން އަންނަ ބިދޭސީ އަންހެނެއްގެ ދަރިއެއް ކަމަށް އެނގިފައިވާ ކަމަށެވެ. ނަމަވެސް އެއީ ކޮން ޤައުމެއްގެ މީހެއްކަން ކަށަވަރު ނުވާ ކަމަށާ، އެއީ އެރަށު މީހެއްގެ ދަރިއެއް ނޫން ކަން ޔަޤީން ވާކަމަށް އެމީހާ ވަނީ ބުނެފައެވެ.

މި މައްސަލައިގައި މައުލޫމާތު ދިން އިތުރު މީހަކު ބުނެފައިވަނީ ކުއްޖާ ފެނިފައިވަނީ ކުނި ގޮނޑަށް ގެންނަ ކުނީގެ ތެރޭގައި ހުންނަ ދަޅާއި ޕްލާސްޓިކް އަދި އެހެނިހެން ތަކެތި ކޮތަޅުތަކުން ނަގައި ވަކިކުރަމުން ދަނިކޮށް ގެސްޓު ހައުސްތަކުން ގެނެވުނު ކުނި އަޅާފައި ހުރި ބޮޑު ކަޅު ކޮތަޅެއްގެ ތެރެއިން ކަމަށެވެ.

އަދި ފެނުނު އިރު ކުއްޖާގެ ފޫޅުވެސް އޮތީ ނުކަނޑައި ކަމަށާ، އެއީ ފިރިހެން ކުއްޖެއް ކަމަށްވެސް މައުލޫމާތު ލިބިފައިވާ ކަމަށް އޭނާ ބުންޏެވެ. އަދި ކުއްޖާ ފެނުނު މީހުންނާއި ހަވާލާދެމުން އެއީ ދުވަސް ފުރާ ވިހާފައިވާ ކުއްޖެއްކަންވެސް އޭނާ ވަނީ ބުނެފައެވެ.

އެކުއްޖާގެ މަންމަ ފުލުހުން ހައްޔަރު ކޮށްފައިވަނީ އޭނާގެ ޤައުމަށް އަނބުރައި ދިޔުމަށް އެއަރޕޯޓްގައި ހުއްޓައެވެ. ހައްޔަރުކޮށްފައިވަނީ ސްރީލަންކާ އަށް ނިސްބަތްވާ އުމުރުން 30 އަހަރުގެ އަންހެނެއް ކަމަށް ފުލުހުން ވަނީ ވިދާޅުވެފައެވެ. 

އޭނާ ހައްޔަރު ކޮށްފައިވަނީ ގަސްދުގައި ކުޑަ ކުއްޖަކު މެރިކަމުގެ ތުހުމަތުގައެވެ.

އެމައްސަލައިގެ ބަންދާއި މެދު ގޮތެއް ނިންމަން އޭނާ މިއަދު ކޯޓަށް ހާޒިރުކުރުމުން ކޯޓުން އަމުރުކޮށްފައިވަނީ މައްސަލައިގެ ޝަރީޢަތް ނިމެންދެން އޭނާ ބަންދުގައި ބެހެއްޓުމަށެވެ.