ހއ. ހޯރަފުށީ ނޫރީގޭ މުހައްމަދު އަރުހަމް، މަރާލި މައްސަލައިގައި ދައުވާކުރި މީހުންގެ ތެރެއިން ތިން މީހެއްގެ މައްޗަށް ކުށް ސާބިތުނުވި މައްސަލަ, އަލުން ބަލަން ހައިކޯޓުން ކްރިމިނަލް ކޯޓަށް މިއަދު އަންގައިފިއެވެ.

އަރުހަމް މަރާލި މައްސަލައިގެ ދައުވާ އުފުލާފައިވަނީ ހަތަރު މީހެއްގެ މައްޗަށެވެ. އެއީ ލ.މާވަށް އެވަރބްލޫގެ، މުޙައްމަދު ވިސާމް އާއި ގދ.ގައްދޫ، ގުންޒަރު، މުޙައްމަދު ސުފްޔާން އާއި ލ. މާވަށް، އަސަރީގެ، މަންޞޫރު ޔޫސުފް އާއި މާލެ، މއ. މަސްފަން، އާޠިފު ރަޝީދެވެ. މީގެ ތެރެއިން ވިސާމްގެ މައްޗަށް އެކަނި ކަމަށް ކްރިމިނަލް ކޯޓުން ނިންމާ، އޭނާ މެރުމަށް ވަނީ ހުކުމް ކޮށްފައެވެ. ނަމަވެސް ކޯޓުން ނިންމީ ބާކީ ތިން މީހުންގެ މައްޗަށް ކުށް ސާބިތުނުވާ ކަމަށެވެ.

އެހެންނަމަވެސް މައްސަލަ އިސްތިއުނާފް ކުރުމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ހައި ކޯޓަށް ފޮނުވުމުން އެ ކޯޓުން ވަނީ މައްސަލަ އަލުން ބެލުމަށް ކްރިމިނަލް ކޯޓަށް އަމުރު ކޮށްފައެވެ.

އެމައްސަލައިގެ އިސްތިއުނާފުގައި ދައުލަތުން ތިން ނުކުތާއެއް ވަނީ ފާހަގަ ކޮށްފައެެވެ.

އިސްތިއުނާފީ ނުކުތާތަކާ ގުޅިގެން ދައުލަތުގެ ފަރާތުން ދިވެހިރާއްޖޭގެ ހައިކޯޓުގައި މައިގަނޑުގޮތެއްގައި ފާހަގަކޮށްފައިވަނީ އަރުހަމް މަރާލި ކަމުގެ ކުށުގެ ދަޢުވާ ސާބިތުކުރުމަށްޓަކައި ހަމަ އެއްހެކިތަކެއް ހުށަހެޅުމުން ، އެހެކިންގެ ހެކިބަހުގައި ފުށުއެރުންތަކެއް ހުރިކަމަށް ފާހަގަކޮށް ހަމައެހެކިތަކުގެ މައްޗަށް ބަލައި، ހަމައެކަނި މުޙައްމަދު ވިސާމްގެ މައްޗަށް ކުށް ސާބިތުވާކަމަށް ކަނޑައަޅާފައިވާއިރު،މުޙައްމަދު ސުފްޔާން އާއި މަންޞޫރު ޔޫސުފް އާއި ޢާޠިފު ރަޝީދުގެ މައްޗަށް ކުށް ސާބިތުނުވާކަމަށް ކަނޑައަޅާފަައިވުމެވެ.

އަދި މުޙައްމަދު ސުފްޔާން އާއި މަންޞޫރު ޔޫސުފް އާއި ޢާޠިފު ރަޝީދު ކުށްކުރުމުގައި ބައިވެރިވެފައިވާ ގޮތަށް ޤާނޫނީ ހަމަތަކުން ބަލާއިރު، މިތިންމީހުންގެ ޢަމަލަކީ ޤަސްދުގައި މީހަކު މެރުމުގެ ޢަމަލެއްކަމަށް ދައުލަތަށް ފާހަަގަ ކުރެވިފައި ވުމެވެ. 

ހަމައެއާއެކު މި މައްސަލައިގައި ދަށު ކޯޓަށް ހުށަހެޅުނު ވީޑިއޯ އެނަލިސިސް ރިޕޯޓުގައި މުޙައްމަދު ސުފްޔާން އާއި މަންޞޫރު ޔޫސުފް ދަނެގަނެވި، ހާދިސާ ހިނގިރޭގެ ފަތިހު 21:13 ހާއިރު ނިއުޗެއިން ފިހާރައިން 3 ވަޅި ގަނެފައިވަނީ މި ފަރާތްތައްކަން ދަނެގަނެވިފައިވާ ކަމަށް ވެސް ހައި ކޯޓުންވަނީ ބުނެފައެވެ.

މީގެ އިތުރުން ޢާޠިފު ރަޝީދު ހިމެނޭހެން 6 މީހަކު މުޙައްމަދު ސުފްޔާން އާއި މަންޞޫރު ޔޫސުފްއާއެކު އެރޭ ޙަރަކާތްތެރިވެފައިވާކަމަށާއި މިފަރާތްތައް ޙަރަކާތްތެރިވި ރޫޓްތައް ބެލިއިރު، މުޙައްމަދު އަރުހަމްގެ މަރާ މި 6 މީހުންނާ ގުޅުހުންހުރިކަމަށް ބެލެވޭކަމަށް ވެސް ހައި ކޯޓުން ވަނީ ބަޔާން ކޮށްފައެވެ.

އެހެންކަމުން  މައްސަލަ ބެއްލަވަން ތިއްބެވި ފަނޑިޔާރު މަޒީދާއި ފަނޑިޔާރު މުހައްމަދު ފައިސަލާއި ފަނޑިޔާރު މުހައްމަދު ނިޔާޒު ވަނީ، އެ ތިން މީހުންގެ މައްޗަށް ކުށް ސާބިތުނުވާ ކަމަށް ކްރިމިނަލް ކޯޓުގެ ހުކުމުގައި ބުނެފައިވާ ބައި ބާތިލުކޮށް، ހައިކޯޓުން ފާހަގަކުރި ކަންތައްތަކަށް ރިއާޔަތްކޮށް މައްސަލަ އަލުން ބަލަން އަންގައިފައެވެ.