ހުސްވެފައިވާ ޕޮލިސް ކޮމިޝަނަރުގެ މަޤާމަށް ބޭފުޅަކު ނެގުން އަވަސްކުރުމަށް އިދިކޮޅު އެންމެ ބޮޑު ޕާޓީ މޯލްޑިވިއަން ޑިމޮކްރެޓިކް ޕާޓީ(އެމްޑީޕީ) އިން ގޮވައިލައިފިއެވެ.

އެމްޑީޕީ އިން މިގޮތަށް ގޮވައިލައިފައިވަނީ ކުށްކުރުމާއި މާރާމާރީ އިތުރުވެފައިވާ ކަމަށް ބުނެ އެމްޑީޕީގެ ފަރާތުން ނެރެފައިވާ ބަޔާނެއްގައެވެ.

އެޕާޓީގެ ބަޔާނުގައި ބުނެފައިވަނީ ދިވެހިރާއްޖޭގެ އަމާންކަން ގެއްލި، ރާއްޖޭގެ އެކި ކަންކޮޅުތަކުގައި ކުށްކުރުމާއި މާރާމާރީތައް އިތުރުވުމަކީ އެ ޕާޓީއިން ނުހަނު ކަންބޮޑުވާކަމެއް ކަމަށެވެ.

ދިރިއުޅޭ ހިޔާވަހީގެ ރައްކާތެރިކަމާއި، މަގުތަކުގެ އަމާންކަން ޤައުމުގައި ގައިމު ނުކުރެވުމަކީ އެ ޕާޓީއަށް ބަލައިގަނެވޭނެ ކަމެއް ނޫން ކަމަށްވެސް އެބަޔާނުގައި ބުނެފައިވެއެވެ.

މާޒީގައިވެސް، ޕީޕީއެމް-ޕީއެންސީގެ ވެރިކަން ބައްޓަން ކުރީ އެމްޑީޕީގެ އަސާސްތަކާއި ނުކިއްސަރުކޮށް ކަމަށް އެމްޑީޕީގެ ބަޔާނުގައި ބުނެފައިވެއެވެ. ޕީޕީއެމްގެ ފުރަތަމަ ސަރުކާރުގައިވެސް މަގުތައް ނާމާންވެ، ގެދޮރުގެ ހަތަރު އިންފާރަކީ އަމިއްލަ ނަފްސުގެ ރައްކާތެރިކަން ކަށަވަރު ނުކުރެވޭ ތަންތަނަށް ވެގެންދިޔަ ކަމަށް އެބަޔާނުގައި ބުނެފައިވެއެވެ. އަދި އެޕާޓީއަށް ފެންނަ ފެނުމުގައި، މި ސަރުކާރުގެ ޢަމަލުތައްވެސް މިހިރީ އެ މަގުން ކަމަށް ވެސް އެމްޑީޕީގެ ބަޔާނުގައި ވެއެވެ.

އެމްޑީޕީގެ ނިމިގެންދިޔަ ސަރުކާރަކީ ފާއިތުވި 15 އަހަރު ތެރޭގައިވެސް ދިވެހިރާއްޖޭގައި އެންމެ ކުށް މަދު ކުރެވުނު ފަސް އަހަރު ކަަމަށް އެޕާޓީގެ ބަޔާނުގައި ބުނެފައިވެއެވެ.

އެމްޑީޕީގެ ބަޔާނުގައި ރައީސް ޑރ. މުޙައްމަދު މުޢީއްޒުގެ ސަރުކާރަށް ގޮވައިލައިފައިވަނީ ރައްޔިތުންގެ ރައްކާތެރިކަން ކަށަވަރުކޮށްދީ ބިރުވެރިކަމެއް ނެތި އުޅެވޭނެ މުޖުތަމައެއް ގާއިމުކޮށްދިނުމަށެެވެ.

މިފާއިތުވި ހަފްތާ އިން ފެށިގެން މާލެ ސިޓީ އާއި އައްޑޫ ސިޓީގައި ވަނީ މާރާމާރީ ތަކެއް ހިންގައިފައެވެ.