ހުޅަނގު އައްސޭރީގައި އިޒްރާއިލްގެ އަމާޒަކަށް ނުވާ ތަނެއް މިހާރު ނެތް ކަަމަށް ހުޅަނގު އައްސޭރީގައި ހުރި ނޫސްވެރިޔަކު ބުނެފިއެވެ.

އަލްޖަޒީރާގައި ނޫސްވެރިޔާ، ޒެއިން ބަސްރާވީ ހުޅަނގުއައްސޭރީގެ ރާމައްﷲ ރިޕޯޓް ކުރަމުން ވިދާޅުވެފައިވަނީ އިޒްރާއިލްގެ ސިފައިން ބައިތްލަހުމް ގައި ހުރި ޕްރިންޓް ކުރާ ފިހާރައަކަށް ވަދެ ބަލައި ފާސްކޮށްފައިވާ ކަމަށެވެ.

“މިތަނުގައި މިހާރު އިޒްރާއިލްގެ “ޓާގެޓް” އަކަށް ނުވާ އެއްވެސް ތަނެއް ނެތް” ޒެއިން ވިދަޅުވެފައިވެއެވެ.

Advertisement

ޒެއިން އިތުރަށް ވިދާޅުވެފައިވަނީ ހުޅަނގު އައްސޭރީގެ ގިނަ ސަރަހައްދު ތަކެއްގައި އިޒްރާއިލް ސިފައިން މެޑިކަލް ރެއިޑް ތައް ހިންގައިފައިވާ ކަމަށެވެ.

އެގޮތުން ޖެނީންގެ ޖެނީން ރެފިޔުޖީ ކޭމްޕާއި، ޖެނީންގެ އަލް ޒަހްރާ ނެއިބަރހުޑް، އަލް ބަސާތީން ނެއިބަރހުޑް، ޖެނީން ހޮސްޕިޓަލް، އަލް އަމްލް ހޮސްޕިޓަލް އަދި ޖެނީންގެ ތަވަލްބާ މިސްކިތުގައި ވެސް ވަނީ މިލިޓަރީ ރެއިޑްތައް ހިންގައިފައެވެ.

މީގެ އިތުރުން ރާމައްﷲގެ ޖަލާޒޫން ނެެއިބަރހުޑް، ޓައުން އޮފް ބައިތް ލިޤްޔާ، ބިދްރުސް އަވަށް އަދި ދެއިރް އަބޫ މިޝްއަލް އަވަށް ހިމެނެއެވެ.

އަަދި ނާބުލުސްގެ އަސްކަރް ރެފިޔުޖީ ކޭމްޕާއި ބައިތްލަހްމުގެ ދެއިޝެޝް ރެފިޔުޖީ ކޭމްޕް ހިމެނެއެވެ.

އިޒްރާއިލުން ޣައްޒާއަށް އޮކްޓޫބަރ 7 ގައި ދޭން ފެށި ހަމަލާތަކާއި އެކު ހުޅަނގުއައްސޭރީގައި ވެސް ޖަރީމާތައް ވަނީ އިތުރުކޮށްފައެވެ. އެގޮތިުން ގިނަ ބަޔަކު ހައްޔަރު ކުރުމާއި، މިލިޓަރީ ރެއިޑް ތައް ހިންގުމުގެ ނަމުގައި އާންމުންގެ ގޭގެ އަށާއި ޢާންމު ތަންތަނަށް ބޮޑެތި ގެއްލުންތަކެއް ވަނީ ދީފައެވެ.