އަރބަންކޯގެ ސީ.އެސް.އާރްގެ ދަށުން ދަރިވަރުންނާއި ބެލެނިވެރިންނަށް ފަސޭހަވާނެހެން ރެހެންދި ސްކޫލްގެ ބޭރުގައި ކެނޮޕީއެއް ގާއިމް ކުރުމުގެ މަސައްކަތް ފަށައިފި އެވެ.

އަރބަންކޯއިން ބުނީ، އެ ކުންފުނީގެ ފަރާތުން ހުޅުމާލޭގައި ދިރިއުޅޭ ރައްޔިތުންނާއި، ހުޅުމާލޭގައި ޤާއިމުކޮށްފައިވާ އެކި އޮފީސް އަދި ސަރުކާރު ވުޒާރާތަކަށް ބޭނުންވާނެ ގިނަ ކަންތައްތަކެއް އެ ކޯޕަރޭޝަންގެ ސީ.އެސް.އާރްގެ ދަށުން ކުރަމުންދާ ކަމަށެވެ.

މިގޮތުން، މިފަދަ ކަންކަން ކުރުމުގައި ހުޅުމާލޭގައި ހުންނަ ސްކޫލުތަކަށް އަބަދުވެސް ހާއްސަ އަހައްމިއްޔަތު ކަމެއް ދީގެން ގިނަ މަސައްކަތްތަކެއް ކުރެވިފައިވާ ކަމަށާ، އެ މަސައްކަތްތަކުގެ ބައެއްގެ ގޮތުގައި ހިމަނައިގެން ރެހެންދި ސްކޫލްގެ އެދުމުގެ މަތިން ސްކޫލްގެ ބޭރުގައި ބެލެނިވެރިން އާންމުކޮށް މަޑޮކޮށްގެން ތިބޭ ސަރަހައްދު ހިޔާކުރަމުގެ މަސައްކަތް މިހާރު ކުރަމުންދާ ކަމަށް ބުނެފައިވެއެވެ.

އަދި އެ ޤާއިމު ކުރެވޭ ކެނޮޕީގެ ބޭނުމަކީ ދަރިވަރުން ގެންގޮސް އަދި ބަލައިދާ ބެލެނިވެރިންނަށް މޫސުން ގޯސްވާ ދުވަސްތަކުގައި ހޫނު ގަދަ ދުވަސްވަރު ހިޔަލުގައި މަޑުކޮށްލެވޭނެ ގޮތެއް ފަހިކޮށްދިނުން ކަމަށް އާބަންކޯއިން ފާހަގަކޮށްފައިވެއެވެ.

އަރބަންކޯއިން ދެމުންގެންދާ ހިދުމަތްތަކުގެ އިތުރުން، ހުޅުމާލޭގައި ޤާއިމު ކުރެވިފައިވާ ސަރުކާރުގެ އެކި ވުޒާރާތަކާއި، އަމިއްލަ ފަރާތްތަކުން ހިންގަމުން ގެންދާ ވިޔަފާރިތަކަށް ވެސް ހުރި އުނދަގޫތައް ބަލާ، ހައްލު ހޯދައިދިނުމުގެ މަސައްކަތް އެ ކޯޕަރޭޝަނުން އަބަދުވެސް ކުރަމުން ގެންދާނެކަމުގެ ޔަޤީންކަން އާބަންކޯއިން އަރުވައެވެ.