ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކެމްޕެއިންގައި ވެވަޑައިގެންނެވި ވައުދު ރަނުން ރަނަށް ފުއްދަވާނެ ކަމުގެ ޔަގީން ކަން އެބައޮތް ކަަމަށް މިނިސްޓަރ އޮފް ސިޓީސް،ލޯކަލް ގަވާމެންޓް އެންޑް ޕަބްލިކް ވޯކްސް އާދަމް ޝަރީފް އުމަރު ވިދާޅުވެއްޖެއެވެ.
ރައީސް ޑރ.މުއިއްޒު ހިޔާ ފްލެޓްގެ ކުލި ކުޑަކުރި ކަމަށް ވިދާޅުވެފައިވާ ހަބަރެއް ހިއްސާ ކުރައްވަމުން މިނިސްޓަރ މިފަދައިން ވިދާޅުވީ މިއަދު އެކްސްގައި ކުރެއްވި ޕޯސްޓެއްގައެވެ.
"ރައްޔިތުންގެ ދިރިއުޅުމަށް ރަނގަޅު އަސަރުކުރާ ގިނަ ކަންކަން ރައީސް ޑރ.މުއިއްޒުގެ ކެބިނެޓް ގައި މިއަދު ނިންމެވުމަކީ ރައީސުލްޖުމްހޫރިއްޔާ ޑރ.މުއިއްޒުގެ ޒައާމަތުގައި ރައްޔިތުންގެ ކުރިމަގު އުޖާލާ ވާނެކަން ހާމަކޮށްދޭ ކަމެއް!"
މިނިސްޓަރ އާދަމް ޝަރީފް އުމަރު ވިދާޅުވިއެވެ.
ރައީސުލްޖުމްހޫރިއްޔާ ޑރ މުހައްމަދު މުއިއްޒު ވަނީ މިއަދު އެމަނިކުފާނުގެ ކެބިނެޓާއެކު ޕްރެސް ކޮންފަރެންސްއެއް ބާއްވާފައެވެ.
މިކޮންފަރެންސްގައި ސަރުކާރުން ކުރުމަށް ހަމަޖެހިފައިވާ މުހިންމު މަސައްކަތް ތަކާއި އެ މަސައްކަތް ތަކުގެ ތަފްސީލް އެމަނިކުފާނު ވަނީ ނޫސްވެރިންނާއި ހިއްސާކޮށް ނޫސްވެރިންގެ ސުވާލުތަކަށްވެސް ޖަވާބު ދެއްވާފައެވެ.
މި ޕްރެސް ކޮންފަރެންސްގެ ރައީސް ޑރ.މުއިއްޒު ހިއްސާ ކުރެއްވި ކަންތައްތަކުގެ ތެރޭގައި ހިޔާ ފްލެޓުގެ ކުލި ކުޑަކުރުމާއި، 1000 ފަޤީރުން ހިލޭ ހައްޖަށް ފޮނުވުމާއި، ގެޒެޓު ކުރި ލިސްޓުގައިވާ ފަރާތްތަކަށް ގޯތި ދޫކުރުމާއި، އާސަންދައިގެ ދަށުން މެޑިކަލް ޗެކަޕްވެސް ހިލޭ ހެދޭގޮތަށް ނިންމެވުން ފަދަ އެތައް ކަމެއް ހިމެނެއެވެ.
ރައީސް ޑރ.މުއިއްޒު ވަނީ އެމަނިކުފާނުގެ ކެބިނެޓާއި މެދު ފަޚުރުވެރިވާ ކަމަށްވެސް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
