އިދިކޮޅު ފަރާތްތަކުން އުޅެނީ ރައްޔިތުންނަށް ގިނަ ކަންތައްތަކެއް ކޮށްދިނުމަށް އަދުގެ ރައީސުލްޖުމްހޫރިއްޔާ ޑރ.މުހަންމަދު މުއިއްޒު ނިންމެވުމާއި ގުޅިގެން އެކަންތައް ހަޖަމުކުރަން ދަތިވެގެންކަމަށް، ތުލުސްދޫ ދާއިރާގެ މެންބަރު އިބްރާހިމް ނަސީމް ވިދާޅުވެއްޖެއެވެ.

ދިވެހިރާއްޖޭގައި ގާއިމްވެތިބި އިންޑިއާ ސިފައިން މި ގައުމުން ބޭލުމަށް އެގައުމުން އެބަސްވުމެއް ވެފައިވާ ނަމަ، އެ އެއްބަސްވުން ހާމަކުރުމަށް ގޮވާލާ އިދިކޮޅު މައި ޕާޓީ، އެމްޑީޕީ އިން ކުއްލި މައްސަލައެއް މަޖިލީހަށް މިއަދު ވަނީ މަޖިލީހަށް ހުށަހަޅާފައެވެ.

މަޖިލީހުގެ ޖަލްސާގައި މިކަމަށް ބަހުސް ކުރައްވަމުން ނަސީމް ވިދާޅުވީ، މި މައްސަލައަކީ ސަރުކާރުން ރައްޔިތުންނަށްޓަކައި އެތަކެއް މުހިންމު އަދި ފައިދާހުރި ކަންތައްތަކެއް ކުރުމަށް ނިންމާފައިވާތީ، އެކަން ބަލައިނުގަނެވިގެން ހުށަހަޅާފައިވާ މައްސަލައެއް ކަމަށެވެ.

އަދުގެ ސަރުކާރަށް ތާއީދުކުރައްވާ ވާހަކަ ދައްވަމުން ނަސީމް ވިދާޅުވީ، މިސަރުކާރު އޮތީ ރައްޔިތުންނަށް ހިދުމަތްކުރުމުގައި ވަރުބަލިކަމެއް ނެތިކަމަށާއި، އަދި ބާރު ދުވެއްޔެއްގައި ސަރުކާރުގެ މަސައްކަތްތައް ކުރިއަށް ދާންފަށާފައިވާ ކަމަށެވެ. ނަމަވެސް އިދިކޮޅު ފަރާތްތަކަށް މިކަން ބަލައި ނުގަނެވޭކަމަށާއި، އެބޭފުޅުން ބޭނުންވަނީ މި އަޑު ކަނޑުވާލަންކަން އޭނާ ފާހަގަކުރެއްވިއެވެ.

ރައީސް ޑރ. މުއިއްޒު ވަނީ ރައްޔިތުންނަށް ލުއިފަސޭހަ ތަކެއް ހޯއްދަވައިދެއްވާ، ރައްޔިތުންގެ ފައިދާއާއި ލާބައަށް ގިނަ ކަންތައްތަކެއް، ވެރިކަމާއި ހަވާލުވެވަޑައިގެންނެވިތާ ވަރަށް ވެސް ކުރު މުއްދަތެއްގެ ތެރޭގައި ނިންމަވާދެއްވާފައެވެ. އަދި އެކަންތައްތައް އެމަނިކުފާނު ވަނީ އިއްޔެ އިއުލާނުކުރައްވާފައެވެ.

އެކަންތައްތަކުގެ ތެރޭގައި ކުރިއަށް އޮތް ފަސް އަހަރު ދުވަހުގެ ތެރޭގައި 1000 ފަގީރުން ހިލޭ ހައްޖަށް ފޮނުވުމަށާއި، މެޑިކަލް ޗެކްއަޕަށާއި، ރާއްޖެއިން ބޭރުގައި ހޮސްޕިޓަލް ބަދަލުވާއިރު އަތުން ކުރަންޖެހޭ ޚަރަދާއި، އައި.ވީ.އެފް. ގެ ފަރުވާއަށް އާސަންދަ ދިނުމަށާއި، ކައުންސިލްތަކުން އެދޭ، އެއަތޮޅެއްގައި ހިމެނޭ ރަށްރަށާއި ފަޅުތަކުގެ ތެރެއިން، އާމްދަނީ ހޯދުމަށް އެކައުންސިލަކަށް ރަށެއް ނުވަތަ ފަޅެއް ވަކި އުސޫލުތަކެއްގެ ދަށުން ލިބޭނެ ގޮތެއް ހަމަޖައްސަވާދެއްވުމުގެ އިތުރުން، ރަށްރަށުގައި އަސާސީ ބޯހިޔާވަހިކަމަށް ދޫކޮށްފައިވާ ފްލެޓްތަކާއި، ހިޔާ އަދި ވިނަރެސް ފްލެޓްތަކުގެ އަގުގެ ގޮތުގައި ދައްކާ އަދަދުތައް ކުޑަކޮށްދެއްވުން ހިމެނެއެވެ.