ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ކެބިނެޓުން އިއްޔެ ނިންމެވި ނިންމުމާއި އެކު ހިޔާ ފްލެޓްތަކުގެ ކުލީގެ ތެރެއިން އެއް ލައްކައެއްހާ ރުފިޔާ މިހާރު މަޢާފްކޮށްދީފައިވާ ކަމަށް އާބަންކޯގެ އެކުންފުނީގެ މެނޭޖިންގ ޑިރެކްޓަރ އިބްރާހީމް ފަޒުލް ރަޝީދު ހާމަކުރައްވައިފިއެވެ.

ފަޒުލް މިފަދައިން ވިދާޅުވީ މިއަދު އާބަންކޯގެ ފަރާތުން ކުރިއަށް މިއަދު ގެންދިޔަ ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.

އެގޮތުން ފަޒުލް ވިދާޅުވީ ސަރުކާރުގެ ނިންމުމާއި އެކު ހިޔާ ފުލެޓަށް ފައިސާ ދައްކަންޖެހޭ މުއްދަތުވެސް ކުޑަވެފައިވާކަމަށެވެ. އަދި މި ބަދަލުގެ ސަބަބުން ރައީސް ވިދާޅުވިގޮތަށް ޖުމްލަ ދެލައްކައެއްހާ ރުފިޔާގެ ޑިސްކައުންޓެއް މިހާރު ފްލެޓްތަކުގެ ވެރިންނަށް ލިބޭނެއެވެ.

ފަޒުލް ވިދާޅުވީ 7 އަރަށް ބަހާލައިގެން ކުލި ކުޑަކުރުމުން، އެއިން ހަމަވަނީ، ލައްކައެއްހާ ރުފިޔާ ކުޑަ ވެގެންދާ ކަމަށެވެ. އަދި އިތުރު އެއްލައްކަ ރުފިޔާ މިހާރު ސަރުކާރުން މަޢާފްކޮށްދިނީކަމަށް ފަޒުލް ވިދާޅުވިއެވެ.

"މި ބަދަލާއެކު އެގްރިމަންޓްތައް މުރާޖަޢާ ކުރުމުގެ މަސައްކަތް މިދަނީ ކުރަމުން. ކުރިން 27 އަހަރާއި އިތުރު މަސްތަކަކަށް ކުލި ދައްކަން ޖެހޭގޮތަށް އޮތީ. މިހާރު ގެނައި ބަދަލުން ދެން ކުލި ދައްކަންޖެހޭނީ 26 އަހަރާއި 3 މަހު. އެހެންވީމަ އެއީ ވަގުތުން ވަގުތަށް ލިބިގެންދިޔަ ޑިސްކައުންޓް." ފަޒުލް ވިދާޅުވިއެވެ.

އިއްޔެ ކެބިނެޓާއި އެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ބޭއްވެވި ނޫސްވެރިންގެ ބައްދަލުވުމުގައި ވަނީ ހިޔާ ފްލެޓްތައް މަރާމާތު ކުރުމަށް ރައްޔިތުންގެ އަތުން ދިޔަ ޚަރަދުތަކަށްވާ ދެލައްކަ ރުފިޔާގެ ފައިސާ 7 އަހަރަށް ބަހާލައިގެން ކުލިން ކުޑަ ކުރާ ގޮތަށް ނިންމަވާފައެވެ.

އެގޮތުން  މިހާރު ހަދާފައިވާ 7 އަހަރު ދުވަހުގެ އެއްބަސްވުމުގައިވާ މަހަކު 5,300 ރުފިޔާގެ ކުލި، މަހަކު 3,984 ރުފިޔާ އަށް ކުޑަ ކޮށްދިނުމަށް ނިންމަވާފައިވާކަމަށް ރައީސް ޑރ.މުއިއްޒު ވަނީ ފާހަގަ ކުރައްވާފައެވެ.