ހުޅުމާލޭގެ ދެވަނަ ފިޔަވަހީގެ ފެލެޓެއްގައި ރޭ މާރާމާރީ ހިންގީ އާއިލީ މައްސަލައެއްގެ ތެރެއިން ކަމަށް ފުލުހުން ބުނެފިއެވެ.

ރޭ އެޗް6ގެ އެޕާޓްމަންޓެއްގައި، މީހަކަށް ތޫނު އެއްޗަކުން ހަމަލާ ދީފައިވާކަމުގެ ރިޕޯޓު ފުލުހުން ނަށް ކޮށްފައިވާ ކަމަށާ، އެ ހަމަލާގައި ފިރިހެނަކު ޒަޚަމްވެފައިވާ ކަމަށް ފުލުހުން ކުރިން ބުންޏެވެ.

އަދި އެ މީހާއަށް ހޮސްޕިޓަލުގައި ފަރުވާ ދެމުންދާ ކަމަށްވެސް ބުންޏެވެ.

މިކަމާއި ގުޅޭ އިތުރު ތަފްސީލް ދެއްވަމުން ފުލުހުން މިއަދު ބުނީ މި މައްސަލައިގައި ރޭ، އުމުރުން 19 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށާއި، އަނިޔާ ލިބުނު 22 އަހަރުގެ މީހާ އަށް ހޮސްޕިޓަލުގައި އަދިވެސް ފަރުވާ ދެމުން އަންނަ ކަމަށެވެ.

މިއާއެކު ފުލުހުން ބުނީ، އޭނާއަށް ހަމަލާ ދީފައިވަނީ އާއިލާ ތެރޭގައި ޖެހުނު މައްސަލައެއްގައިކަން، މިހައިތަނަށް ބެލި ބެލުމުން އެނގިފައިވާ ކަމަށާ މި މައްސަލަ ފުލުހުން  ތަޙުޤީޤު ކުރަމުންދާ ކަމަށެވެ.