ޖޭއެސްސީގެ މެންބަރުންގެ ތެރެއިން ގާނޫނީ ވަކީލް ސްލޮޓަށް ކުރިމަތިލެއްވި، ހައިކޯޓުގެ ކުރީގެ އިސް ފަނޑިޔާރު ޝުޖާއު އުސްމާން އެ މަގާމަށް ޝަރުތު ހަމަނުވާ ކަމަށް ބާ ކައުންސިލުން ނިންމީ ރަނގަޅަށް ކަމަށް ސިވިލް ކޯޓުން މިއަދު ހުކުމް ކޮށްފި އެވެ.

ޝުޖާއު އުސްމާންގެ ޝަރުތު ހަމަނުވާ ކަމަށް ބާ ކައުންސިލުން ނިންމުމުން އެމައްސަލަ ސިވިލް ކޯޓަށް ޝުޖާއު ހުށައެޅީ މިދިޔަ ހޯމަ ދުވަހު އެވެ.

މައްސަލައިގައި ސިވިލް ކޯޓުން ކުރި ހުކުމްގައި ވަނީ ޖުޑީޝަލް ކޮމިޝަންގެ ގާނޫޏުގެ 5 ވަނަ މާއްދާގައިވާ (ހ) އާއި (ށ) އަށް ބެލުމުން، އެގާނޫނުގެ 3 ވަނަ މާއްދާގެ 10 ވަނަ ނަންބަރުގެ ދަށުން ގާނޫނީ ވަކީލުންގެ ތެރެއިން  ސިވިލް ސާވިސް ކޮމިޝަނަށް އައްޔަނުކުރާ މެމްބަރުގެ ކިބައިގައި ހުންނަން ޖެހޭ ސިފަ ތަކަކީ އެ މަގާމަށް ހުށައަޅާއިރުވެސް ފުރިހަމަ ވެފައި ހުންނަން ޖެހޭ ސިފަ ތަކެއްކަމަށެވެ.

Advertisement

ޝުޖާއުގެ ކިބައިގައި މި ޝަރުތުތައް ފުރިހަމަ ނުވާކަމަށް ބާ ކައުންސިލުން ކަނޑައަޅާފައިވާ އެ މާއްދާގެ މަފްހޫމާއި މަގްސަދާއި ހިލާފު ވެވޭނެ ގޮތެއް ނެތްކަމަށް ބުނެ ސިވިލް ކޯޓުން ވަނީ މައްސަލަ ޝުޖާއު އާއި ދެކޮޅަށް ނިންމާފައެވެ.

ޖޭއެސްސީގައި ގާނޫނީ ވަކީލުންގެ ތެރެއިން އިންތިހާބު ކުރާ މެންބަރުގެ މަގާމު ހުސްވީ، ކުރިން އެ މަގާމުގައި ހުންނެވި އަބްދުލް މާނިއު ހުސައިން އިސްތިއުފާ ދެއްވުމުންނެވެ. މާނިއު ފަހުންވަނީ ހައިކޯޓުގެ ފަނޑިޔާރުކަމަށް ނަގައިފައެވެ.