ދުންޔަވީ ގޮތުން ބޭނުންވާ ގިނަ މާއްދާތައް ދަރިންނަށް ކިޔަވައި ދިނުމަށް އަހަރެމެންނަށް ގަދައަޅައި މަސައްކުރެވުމަށް އިސްލާމީ ސައްހަ އަޤީދާ އެކުދިންނަށް އުގަންނައި ދިނުމަށް މަސައްކަތް ނުކުރެވޭ ކަމަށް މިއަދުގެ ޚުތުބާގައި ބުނެފިއެވެ. 

''އިންސާނާގެ ހަޔާތުގައި ސައްހަ އަގީދާގެ މުހިއްމުކަން'' މިމައުޟޫއަށް އިއްވި ޚުތުބާގައި ބުނީ މައިންބަފައިން އަބަދުވެސް އެބައިމީހުންގެ ދަރިންނާމެދު ފޮނި އުންމީދުތައް ކުރާ ކަމަށާއި، އެ ދަރިން ދީނީ ކަންތައްތަކަށް ހުރުމަށްތެރިކޮށް ހިތައި ކިޔެވުމުގައި މޮޅު އަދި ގައުމާއި މުޖުތަމައަށް ފައިދާކޮށްދޭނެ ކުދިންނަށްވުމަށް އެދޭ ކަމަށެވެ. އަދި މައިންބަފައިން އެ އުއްމީދުތައް ހާސިލުކުރުމަށް ބުރަ މަސައްކަތް ކުރާ ކަމަށާއި ބޮޑެތި ހަރަދުތައް ކުރާ ކަމަށެވެ.

އެގޮތުން ކުދިން ޅަފަތުގައި ކިޔަވައި ދިނުމަށް މައިންބަފައިން މަސައްކަތް ފަށައި، ކިޔެވުމަށް ބޭނުންވާ އެންމެހައި ތަކެތި ހޯދައިދޭ ކަމަށާއި ގަޑިންގަޑިއަށް އެކުދިން ސްކޫލަށް ފޮނުވުމާއި ގުރުއާން ކިލާސްތަކަށް ގެންދިޔުމުގެ ޒިންމާ ފުރިހަމައަށް އަދާކުރާ ކަމަށާ، އެހެން ނަމަވެސް މިހާރަކަށް އައިސް އެބުރަ މަސައްކަތާއި ބޮޑެތި ހަރަދުތައްކުރާ މައިންބަފައިންގެ ތެރެއިން ގިނަ ބަޔެއްގެ ފޮނި އުންމީދުތައް އެންމެ އެދެވޭ ގޮތުގައި ހާސިލުވަމުން ނުދާކަން ފާހަގަކުރެވޭ ކަމަށް ޚުތުބާގައި ބުނެފައިވެއެވެ.

މައިންބަފައިން މިކުރާ ބުރަ މަސައްކަތް ކާމިޔާބު މަސައްކަތަކަށްނުވާތީ އެކަމާއިމެދު ފިކުރުކޮށް އެކަމަށް ހައްލެއް ލިބޭތޯ މަސައްކަތްކުރަނީ ކިތައް ކިތައް މައިންބަފައިކަމާމެދު ޚުތުބާގައި ވަނީ ސުވާލު އުފައްދާފައެވެ.

ޚުތުބާގައި ބުނީ އަގީދާއަކީ އީމާންކަމުގެ އަސާސް ކަމަށާއި، އެ އަސާސުގެ މައްޗަށް ދަރިން ތަރުބިއްޔަތު ވެގެން މެނުވީ ރަނގަޅު ޖީލެއް ބިނާ ނުކުރެވޭނެ ކަމަށެވެ. އަދި މާތް الله ރަސޫލު ބޭކަލުން ފޮނުއްވާ، އެބޭކަލުންނަށް ފޮތް ތައް ބާއްވާލެއްވީވެސް އިންސާނުންގެ އަގީދާ ރަނގަޅުކޮށް މާތް الله ނޫން އެހެންފަރާތަކަށް އަޅުކަން ނުކުރުމަށް މީސްތަކުންނަށް އެންގެވުމަށްޓަކައި ކަމަށް ޚުތުބާގައި ބުނެފައިވެއެވެ. 

މިއާއެކު ޚުތުބާގައި ބުނީ ޅަދަރިންގެ ހިތްތަކުގައި އިސްލާމީ އަގީދާ ވަރުގަދައަށް ބިންވަޅުނެގިފައިނުވާ ނަމަ އެ ދަރިން އިސްލާމް ދީނާ ހިލާފު އެކިއެކި އޮއިވަރުތަކުގައި ޖެހި ހައްގު މަގުން އެއްކިބާވެގެން ދިއުމަކީ ދާދި ގާތުގައިވާ ކަމެއް ކަމަށެވެ.

އެހެންކަމުން އިސްލާމީ އަގީދާ ފުނޑުފުނޑު ކޮށްލުމަށް ޣައިރު މުސްލިމުން ކެނޑިނޭޅި އުފައްދާ ޝުބުހަތަކާއި ޝައްކުތަކުގެ ޝިކާރައަކަށް އެކުދިން ވެދާނެތީ އެކަމާއިމެދު ސަމާލުވުމަށް ޚުތުބާގައި ވަނީ އެދިފައެވެ. އަދި މީސްމީޑިއާގެ އެކިއެކި ވަސީލަތްތައް ބޭނުންކުރުން އާއްމުވެފައިވާ މިފަދަ ޒަމާނެއްގައި ދަރިންނަކީ ދީނުގެ ފުރިހަމަ މައުލޫމާތު ލިބިފައިވާ އަދި ސައްހަ އަގީދާގެ މަތީގައިވާ ދަރިންކަމުގައިވާނަމަ އެފަދަ ވަސީލަތްތަކުގެ ޒަރީއާއިން އެކުދިންގެ ސިކުނޑިތަކާއި ކުޅެކުމަކީ ފަސޭހަ ކަމަކަށްނުވާނެ ކަން ޚުތުބާގައި ވަނީ ފާހަގަކޮށްފަ އެވެ.

ޚުތުބާގައި އިތުރަށް ބުނީ ދަރިންނަށް އިސްލާމީ އަގީދާ ކިޔަވައިދިނުމަކީ އަހަރެމެންގެ ކޮނޑުގައި އެޅިފައިވާ އެންމެ މުހިންމު މަސްއޫލިއްޔަތު ކަމުގައިވާއިރު، މި މަސްއޫލިއްޔަތު އަދާކުރުމުގައި ބެލެނިވެރިންނާއި ތައުލީމީ މުއައްސަސާތަކުން ފަރުވާކުޑަ ނުކުރުމަށް ޚުތުބާގައި ވަނީ އިލްތިމާސްކޮށްފަ އެވެ.