ސްޓެލްކޯގެ އާ ޗެއާމަނަކަށް އެ ކުންފުނީގައި 34 އަހަރު ވަންދެން މަސައްކަތް ކުރެއްވި އަދި އެންމެ ފަހުން ޑެޕިއުޓީ މެނޭޖިން ޑިރެކްޓަރު (ޑީއެމްޑީ) ގެ މަގާމުފުރުއްވި މުހައްމަދު ލަތީފު އައްޔަންކޮށްފި އެވެ.

އިއްޔެ ޕީސީބީން ކުރި އިޢުލާނެއްގައި ވަނީ، ސްޓެލްކޯގެ ޗެއާމަންކަމާއި ޑިރެކްޓަރުންގެ ބޯޑުގައި ހުންނެވި ސ.ހިތަދޫ ލެގޫންވިއު ބްރިގޭޑިއަރ ޖެނެރަލް އިބްރާހިމްދީދީ މި މަހުގެ ހަތަރުވަނަ ދުވަހުން ފެށިގެން އެ މަގާމުން އިސްތިއުފާ ދެއްވުމަށް ހުށަހަޅުއްވާފައިވާތީ އޭނާ އެ މަގާމުން ވަކިކުރައްވައި އެ މަގާމަށް ވ.މޫދުފެހި މުޙައްމަދު ލަޠީފް ވަނީ އައްޔަންކޮށްފައިވާ ކަމަށް ބުނެފައެވެ.

ލަތީފަކީ ސްޓެލްކޯގެ ޑެޕިއުޓީ މެނޭޖިން ޑިރެކްޓަރު ކަން 10 އަހަރު ވަންދެން ކުރައްވާފައެވެ. އަދި އެ ކުންފުނީގެ މެނޭޖިންގް ޑިރެކްޓަރ ކަމުގެ މަގާމުގެ 8 މަސްދުވަހު އަދާކުރައްވާފައިވެއެވެ.

ސްޓެލްކޯގެ ޑެޕިއުޓީ މެނޭޖިން ޑިރެކްޓަރު ކަމުގެ މަގާމުގައި ހުންނެވުމަށްފަހު, ލަތީފްގެ އުމުރުން 65 އަހަރު ވުމުން މުސްކުޅި ކުރެއްވީ ނިމިދިޔަ ނޮވެމްބަރު މަހުގެ 27 ވަނަ ދުވަހުގައެވެ.

ލަތީފް ސްޓެލްކޯގެ ޗެއާމަން އަކަށް ހަމަޖައްސާފައިވާއިރު، އެސްޓީއޯގެ ޗެއާމަންކަމާއި ޑިރެކްޓަރުންގެ ބޯޑުގައި ހުންނެވި މއ.ޗަބޭލީގެ ޙާމިދު ނަޝީދު އެ މަގާމުން ވަކިކުރައްވައި އެ މަގާމަށް މއ.މަނަސް އާމިރު މަންޞޫރު އައްޔަންކޮށް, އެސްޓީއޯގެ ޑިރެކްޓަރުންގެ ބޯޑުގެ ހުސްވެފައިވާ މަގާމަށް މުޙައްމަދު މުރާދުވެސް އިއްޔެ ވަނީ އައްޔަން ކޮށްފައެވެ.

އަދި އާސަންދަ ކޮމްޕެނީގެ ޑިރެކްޓަރުންގެ ބޯޑުގެ ހުސްވެފައިވާ މަގާމަށް ގދ.ފިޔޯރީ މަލަމަތި ފައިޞަލް އިބްރާހިމް ވަނީ އައްޔަން ކޮށްފައެވެ.