ރާއްޖެއަށް އެންމެ ގިނައިން ފިޔާ އެތެރެކުރާ އިންޑިއާއިން ފިޔާ އެކްސްޕޯޓް ކުރުން ވަގުތީ ގޮތުން ހުއްޓާލައިފި އެވެ.
ފިޔާ އެކްސްޕޯޓް ކުރުން ވަގުތީ ގޮތުން ހުއްޓާލަން އިންޑިއާގެ ސަރުކާރުން އަންގާފައި ވަނީ 7 ޑިސެމްބަރުވީ ބުރާސްފަތި ދުވަހުގައި ކަމަށް "ރޮއިޓާސް" އިން ވަނީ ރިޕޯޓް ކޮއްފައެވެ.
މި ފިޔަވަޅަކީ އަންނަ އަހަރު އިންޑިއާގައި ބާއްވާ ލޮކް ސަބާ އިންތިހާބާއި ގުޅިގެން، އެ ގައުމުގައި އިންފްލޭޝަން ދަށްކުރުމުގެ ގޮތުން އެޅިފިޔަވަޅެށް ކަމަށް އިންޑިއާގެ ބައެއް ނޫސްތަކުން ވަނީ ރިޕޯޓުކޮށްފަ އެވެ.
އެހެން ނަމަވެސް، މިހާތަނަށް ފައިސާ ދައްކާ އަދި ޝިޕްކޮށް ނިންމާފައިވާ ފިޔަލުގެ ޝިޕްމަންޓްތަކުގެ އިތުރުން ސިސްޓަމްގައި ފިޔާ ގަންނަން ރަޖިސްޓްރީ ކޮއްފައިވާ ތަންތަނަށް 2024 ވަނަ އަހަރު ޖެނުއަރީ މަހު 5 ވަނަ ދުވަހު ނިޔަލަށް ފިޔާ އެކްސްޕޯޓް ކުރެވޭނެ ކަމަށް އިންޑިއާގެ ފޮރިން ޓްރޭޑް މިނިސްޓްރީއާ ހަވާލާދީ ނޫސްތަކުން ރިޕޯޓުކޮށްފައި ވެއެވެ.
ފިޔާ އެކަސްޕޯޓް ކުރުން އިންޑިއާގެ ސަރުކާރުން ވަގުތީ ގޮތުން ހުއްޓާލި ނަމަވެސް، އެހެން ގައުމުތަކުގެ ސަރުކާރުން އެކަމަށް އެދި ހުށްއަޅައެޅުމުން އިންޑިއާގެ ސަރުކާރުގެ ހުއްދަ ދޭ ގައުމުތަކަށް ފިޔާ އެކްސްޕޯޓު ކުރާނެކަމަށް ވެސް ނޫސްތަކުގައި ބަޔާންކޮށްފައި ވެއެވެ.
Advertisement
This content is created and paid for by advertisers and does not involve Voice Journalists
