ޤުރުއާން ކިޔެވުމުގެ 36 ވަނަ ޤައުމީ މުބާރާތަށް ރަޖިސްޓްރީ ވުމަށް ކީރިތި ޤުރުއާނާ ބެހޭ މަރުކަޒުން ހުޅުވާލައިފިއެވެ.
މިކަމާއި ގުޅޭ ގޮތުން ކީރިތި ޤުރުއާނާ ބެހޭ މަރުކަޒުން ނެރުނު އިއުލާން ގައި ބުނެފައި ވަނީ މުބާރާތަށް ރަޖިސްޓްރީ ވުމަށް މިމަހުގެ 17 ވަނަ ދުވަހުނެ ފެށިގެން އަންނަ އަހަރުގެ ޖެނުއަރީ 18 އާއި ހަމައަށް ހުޅުވާލާނެ ކަމަށެވެ.
މި މުބާރާތް ބޭއްވުމަށް ހަމަޖެހިފައިވަނީ 2024 ވަނަ އަހަރުގެ ފެބްރުއަރީ މަހުގެ 23 އިން ފެށިގެން މާޗު މަހުގެ ދެވަނަ ދުވަހާއި ނިޔަލަށެވެ.
މި މުބާރާތް ކުރިއަށް ދާނީ ތިން ބަޔަކަށް ބަހާލެވިގެންނެވެ. އެއީ އެއީ ހާފިޒުންގެ ބަޔާއި، ސްކޫލް ކުދިންގެ ބަޔާއި މުވައްސަސާތަކުގެ ބައި ކަމަށް ކީރިތި ޤުރުއާނާއި ބެހޭ މަރުކަޒުން މައުލޫމާތު ދެއެވެ.
ކޮންމެ ބަޔަކުން އެއް ވަނަ، ދެވަނަ އަދި ތިން ވަނަ ހޮވުމަށް ވަނީ ހަމަޖެހިފައިވާ ކަމަށާއި، މުޅި މުބާރާތުންވެސް އެއްވަނަ ދެވަނަ އަދި ތިން ވަނަ ހޮވާ އިރު، މުބާރާތުގެ ކޮންމެ ބަޔަކުންވެސް އެއްވަނަ ބައިވެރިޔަކަށް ރައީސްގެ ހާއްސަ އިނާމް ދެއްވާނެ ކަމަށް ވެސް އެއިދާރާއިން ވަނީ ބުނެފައެވެ.
ކޮންމެ އަހަރަކުވެސް ކީރިތި ޤުރްއާން އާއި ބެހޭ މަރުކަޒުން ބާއްވާ ކީރިތި ޤުރުއާން ކިޔެވުމުގެ ޤައުމީ މުބާރާތަކީ ދިވެހިން ގެ ހިތް ތަކުގައި ކީރިތި ޤުރުއާން ކިޔެވުމަށް ލޯބި ޖައްސައި، ޤުރުއާން ކިޔެވުމުގެ ފަންނު އާލާކޮށް ދިރުވައި، ފެތުރުމުގެ މަޤްސަދުގައި ބާއްވާ މުބާރާތެކެވެ.
Advertisement
This content is created and paid for by advertisers and does not involve Voice Journalists
