ކުރީގެ ރައީސް މުހައްމަދު ނަޝީދު އިސްވެ ހުންނަވައި އުފެއްދެވި ދަ ޑިމޮކްރެޓްސް އަަށް 10،000 މެމްބަރުން ހަމަ ކުރުމުގެ މަސައްކަތް ފަށައިފިއެވެ.

އެ ޕާޓީގެ ވިމެން ޑިމޮކްރެޓްސް ލީޑަރު، ފާތިމަތު ހަމްދާ މުހައްމަދު މިފަދައިން ވިދާޅުވީ މިއަދު އެކްސް ގައި ކުރެއްވި ޕޯސްޓެއްގައެވެ.

ހަމްދާ ވިދާޅުވީ ޕާޓީއަށް 10،000 މެންބަރުން ހަމަކުރުމުގެ މަސައްކަތް އާހިތްވަރަކާއި އެކު އަނެއްކާވެސް ފަށާފައިވާ ކަމަށެވެ.

ސިޔާސި މަސްރަހު މިހާ ހަލަބޮލި ދަނޑިވަޅެއްގައި ދެވަނަ ވިސްނުމަކަށް ނުގޮސް ޑިމޮކްރެޓްސް އަށް ސޮއި ކުރަމުން ދާ މީހުންނަށް މަރުހަބާ ވިދާޅުވެ ހަމްދާ ވަނީ ޝުކުރު އަދާކުރައްވާފައެވެ.

މިދިޔަ އޯގަސްޓް މަހުގެ 7 ވަނަ  ދުވަހާއި ހަމައަށް އިލެކްޝަން ކޮމިޝަން ގައި އެ ޕާޓީގެ މެމްބަރުންގެ ގޮތުގައި 3280 މީހުން ތިބި ނަމަވެސް ދާދި ފަހުން ބޭއްވި އެ ޕާޓީގެ ފުރަތަމަ އެތެރޭގެ އިންތިޚާބުގައި 5000 އަށް ވުރެ ގިނަ މެންބަރުންނަށް ވޯޓު ލުމުގެ ހައްގު ވަނީ ދީފައެވެ.

މި އިންތިހާބުގައި، ދަ ޑިމޮކްރެޓްސްގެ ފުރަތަމަ ރައީސްގެ މަގާމަށް އިންތިޚާބުވެފައި ވަނީ، ޕާޓީގެ މުއައްސިސް، ހެންވޭރު ހުޅަނގު ދާއިރާގެ މެމްބަރު ހަސަން ލަތީފް އެވެ. އެ ޕާޓީގެ ޒުވާނުންގެ ނައިބު ރައީސް އަކީ މަޑަވެލި ދާއިރާގެ މެންބަރު ހުސައިން ފިރުޝާން އެވެ. އަދި ޕާޓީގެ  އަންހެން ނައިބު ރައީސް ގެ މަގާމަށް އައިޝަތު އަލައިކާ އަދުނާން އިންތިހާބު ވެފައި ވާއިރު ޕާޓީގެ ޔަންގް ޑިމޮކްރެޓްސް ލީޑަރަކީ މުހައްމަދު މާސިހު (މާޗީ) އެވެ. ޔަންގް ޑެމް ޑެޕިއުޓީ ލީޑަރަކަށް އިންތިހާބު ވެފައިވަނީ ފިތުރާ މުހައްމަދު އެވެ.

ދައުލަތުން ސިޔާސީ ޕާޓީތަކަށް ދޭ ފައިސާ ކަނޑައަޅާނީ އެއަހަރެއްގެ ފަހު ދުވަހާއި ހަމަޔަށް އެ ޕާޓީއެއްގައި ތިބި މެންބަރުންގެ އަދަދައްކަމުން، ރާއްޖޭގައި ހަރަކާތްތެރިވާ ގިނަ ސިޔާސީ ޕާޓީތަކުން އަންނަނީ މެންބަރުން އިތުރުކުރުމުގެ ހަރަކާތްތައް ރާއްޖޭގައި ހިންގަމުންނެވެ.