އައްޑޫސިޓީގެ ގުޅިފައިވާ ރަށްތަކަށް ފެނުގެ ހިދުމަތް ކެނޑިފައިވާ މައްސަލަ ހައްލުކޮށް ފެން ޕްލާންޓް ހިންގަން ފަށައިފިއެވެ.
އައްޑޫސިޓީގެ ގުޅިފައިވާ ރަށްތަކަށް ފެނުގެ ހިދުމަތް ފޯރު ކޮށްދިނުމަށް ފެނަކައިން ހިންގަމުން އައި ފެން ޕްލާންޓް އަށް ކުރިމަތިވި މައްސަލަ މިހާރު ހައްލު ކުރެވި ގޭބިސީތަކަށް ފެން ދޫކުރަން ފަށާފައިވާ ފެނަކައިން ވަނީ މައުލޫމާތު ދީފައެވެ.
މި މަހުގެ 7 ވަނަ ދުވަހުން ފެށިގެން ފެނުގެ ހިދުމަތް އައްޑޫ ސިޓީން ކެނޑިފައިވަނީ އާރޯ ޕްލާންޓުގެ ވީއެފްޑީ ޑްރައިވަށް ދިމާވި މައްސަލައަކާއި ގުޅިގެންނެވެ.
މި މައްސަލަ ދިމާވީ ތާވަލު ކުރެވިގެން ކުރަން ޖެހޭ މަސައްކަތްތައް ކުރުމަށް އިސްކަމެއް ދެވިފައި ނުވާތީ އާއި، ޔޫޓިލިޓީ ރެގިއުލޭޓާ އޮތޯރިޓީން އިންސްޕެކްޓް ކޮށް ހައްލު ކުރަން ޖެހޭ ކަންކަން ހައްލުކުރުމަށް އަންގާފައިވާ ރިޕޯޓަށް އަމަލު ނުކުރެވުމުގެ ސަބަބުން ކަމަށް މިހާތަނަށް ބެލި ބެލުމުން ފާހަގަ ކުރެވިފައިވާ ކަމަށް ފެނަކައިގެ މެނޭޖިންގ ޑިރެކްޓަރ މުއާޒު ވަނީ ވޮއިސް އަށް މައުލޫމާތު ދެއްވާފައެވެ.
ޕްލާންޓަށް މައްސަލަ ދިމާވިތާ ކުޑަ އިރުކޮޅެއްގެ ތެރޭގައި ފެނުގެ ޚިދުމަތް މެދުކެނޑިފައިވަނީ އެކަށީގެންވާ ފެނުގެ ސްޓޯރޭޖް ގާއިމް ކުރެވިފައި ނުވާތީ ކަމަށްވެސް ފެނަކައިން މިރޭ ނެރެފައިވާ ބަޔާނުގައިވެއެވެ.
މީގެ އިތުރުންވެސް ޚާއްސަ ސަމާލުކަމެއް ދީގެން ރައްޔިތުންނަށް ފޯރުކޮށްދޭންޖެހޭ ޚިދުމަތް މެދުނުކެނޑި ދިނުމަށް ކުރަންޖެހޭ ހުރިހާ މަސައްކަތްތައް ހަރުދަނާ އިންތިޒާމުތަކެއްގެ ތެރެއިން ކުރާނެ ކަމުގެ ޔަގީންކަން އެ ކުންފުނިން ވަނީ އަރުވާފައެވެ.
ފެނަކައިން ވަނީ އެމްޑަބްލިއުއެސްސީން މިމައްސަލަ ހައްލު ކުރުމަށްޓަކައި ފޯރުކޮށްދިން އެހީތެރިކަމާއި، ފެނަކަ ކުންފުނީގެ އިންޖިނިއަރުންނާއި މައްސަލަ ހައްލު ކުރުމަށް ބޭނުންވާ ތަކެތި ފޯރުކޮށްދިނުމަށް މޯލްޑިވިއަނުން ވެދިން އެހީތެރިކަން ފާހަގަކޮށް ޝުކުރު އަދާ ކޮށްފައެވެ.
Advertisement
This content is created and paid for by advertisers and does not involve Voice Journalists
