ކުރިއަށް އޮތް މާލެ ސިޓީގެ މޭޔަރު ކަމުގެ އިންތިހާބުގައި ވާދަކުރުމަށް މިހާތަނަށް ފޯމް ހުށައަޅާފައި ވަނީ އަމިއްލަ ގޮތުން ކުރިމަތިލާ ކެނޑިޑޭޓެއް ކަމަށް އިލެކްޝަންސް ކޮމިޝަން(އީސީ) ގެ ނައިބު ރައީސް އިސްމާއީލް ހަބީބް ވިދާޅުވެއްޖެއެވެ.
މިއަދު އެކްސް ގައި ހަބީބް ކުރެއްވި ޓްވީޓެއްގައި ވިދާޅުވީ އީސީ އިން އޭނާގެ އެޕްލިކޭޝަން ގެ ސައްޙަކަން ޤަބޫލުކޮށް ޖަވާބު އަރުވާފައިވާނެ ކަމަށެވެ.
މާލެ ސިޓީ މޭޔަރުކަމުގެ މަޤާމަށް ކުރިމަތިލުމަށް, އެޕްލިކޭޝަން ހުށަހެޅުމުގެ ފުރުޞަތު 2023 ޑިސެންބަރު 13 ވާ ބުދަ ދުވަހުގެ 14:00 ގެ ނިޔަލަށް ހަމަވާނެއެވެ.
މާލޭ ސިޓީގެ ހުސްވެފައިވާ މޭޔަރުގެ މަޤާމާއި، މެންބަރުން ހޮވުމަށް ބާއްވާ ބައި އިލެކްޝަން ބޭއްވުމަށް ހަމަ ޖެހިފައިވަނީ އަންނަ އަހަރުގެ ޖެނުއަރީ މަހުގެ 13 ވަނަ ދުވަހު އެވެ. އަދި މި އިންތިޚާބުގެ ރަސްމީ ނަތީޖާ އިއުލާނު ކުރާނީ ޖެނުއަރީ މަހުގެ 15 ދުވަހުއެވެ.
މިހާތަނަށް ތިން ޕާޓީއަކުން މި އިންތިހާބުގައި ވާދަ ކުރާނެ ކަމަށް ވަނީ އިއުލާން ކޮށްފައެވެ. އެއީ އެމްޑީޕީގެ ފަރާތުން އެމްޓީސީސީގެ ކުރީގެ ސީއީއޯ އާދަމް އާޒިމް، ޕީޕީއެމްގެ ފަރާތުން ކުރީގެ ބަންޑާރަ ނާއިބު އާއިޝަތު އާޒިމާ ޝަކޫރު، ދަ ޑިމޮކްރެޓްސްގެ ފަރާތުން މާލޭ ސިޓީގެ ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހް އެވެ. އަދި ރައީސް ޔާމީން އިސްކޮށް ހުންނަވައިގެން އުފައްދަވަން މަސައްކަތްކުރާ، ޕީޕަލްސް ނެޝަަނަލް ފްރަންޓުގެ ފަރާތުން މި އިންތިހާބުގައި ކުރީގެ ކޮމިޝަނާ އޮފް ޕޮލިސް ހުސައިން ވަހީދު ވާދަކުރައްވާނެ ކަން ވަނީ އިއުލާން ކޮށްފައެވެ.
Advertisement
This content is created and paid for by advertisers and does not involve Voice Journalists
