ނަބިއްޔާ صَلَّى اللهُ عَلَيهِ وَسَلَّم ރަސޫލުކަމައިގެން ފޮނުއްވުމުގެ ކުރިން ޖިންނީންގެ ތެރެއިންވާ ޝައިޠާނުން އުޑަށް އަރައި، ބިމުގައި ހިނގުމަށް ހަމަޖެހިފައިވާ ކަންކަމުގެ ވާހަކަތައް މަލާއިކަތް ބޭކަލުން ދައްކަވާ އަޑުއަހައި، ސިޙުރުވެރިންނާއި ކާހިނުންނަށް އެ ޚަބަރުތައް ފޯރުކޮށްދީއުޅުނެވެ. މިކަމުގެ ތެރެއިން ކުރިއަށް ހިނގާނެ ބައެއްކަންކަމުގެ ވާހަކަތަކުގެ ޚަބަރުތައް އެބައިމީހުންނަށް ލިބެމުން ދިޔައެވެ.

ނަބިއްޔާ صَلَّى اللهُ عَلَيهِ وَسَلَّم ރަސޫލުކަމައިގެން ފޮނުއްވުމާއެކު، އުޑުން އެހުމުން ވައްކަންކުރުން ޝައިޠާނުންނަށް މަނާކުރެވުނެވެ. އެކަންކުރަން އުޅެއްޖެނަމަ، އެބައިމީހުންނާ ދިމާލަށް ގިނަހިލަ އުކެވެން ފެށުނެވެ. މިކަމަކީ މިބައިމީހުންނަށް ވަރަށް ބޮޑުކަމަކަށް ވިއެވެ. މުސްތަޤްބަލުގައި ހިނގާނެ ބައެއް ކަންކަމުގެ ޚަބަރުތައް ލިބިލިބި ހުއްޓައި އެކަމަށް ހުއްޓުން އައީއެވެ. 

އުޑުން ޚަބަރުތައް ހޯދުމަށް މަސައްކަތްކުރި ޝައިޠާނުންގެ ބަޔަކަށް އެކަން ނުކުރެވި، މިކަމުގެ ހިތާމައާއެކު އެބައިމީހުންގެ ޤައުމުގެމީހުންގެ ގާތަށް ދިޔުމުން ސުވާލުކުރިއެވެ. "ތިޔަބައިމީހުންނަށް ވީ ކިހިނަކުން ހެއްޔެވެ؟" ޖަވާބުގައި އެބައިމީހުން ބުންޏެވެ. "ތިމަންމެނާ އުޑުގެ ޚަބަރުތަކާދެމެދަށް ހުރަސް އެޅިއްޖެއެވެ. ތިމަންމެނާ ދިމާލަށް ގިނަހިލަ އުކެވެން ފަށައިފިއެވެ." ޤައުމުގެމީހުން ބުންޏެވެ. "ތިޔަބައިމީހުންނާ އުޑުގެ ޚަބަރުތަކާދެމެދު ހުރަސްއެޅެނީ ކޮންމެވެސް ބޮޑުކަމެއް ހިނގައިގެންނެވެ. ބިމުގެ އިރުމައްޗަށާއި ހުޅަނގަށް ދަތުރުކޮށްގެން ވެގެންއުޅޭގޮތެއް ބަލާށެވެ!"

ވެގެންއުޅޭގޮތެއް ހޯދުމަށް މިބައިމީހުން ބިންމަތީ ދަތުރުކުރަމުން އައިސް، އެއިގެ ތެރެއިން ދިހައަކާ ގާތްކުރާ ޢަދަދެއްގެ ބަޔަކު މައްކާގެ ތިހާމާއޭ ކިޔުނު ދިމާލަށް އައެވެ. އެއިރު ނަބިއްޔާ صَلَّى اللهُ عَلَيهِ وَسَلَّم މައްކާގެ އެއް ފަރާތެއްގައިވާ عُكَّاظُ އޭ ކިޔުނު ބާޒާރަށް ވަޑައިގެންނެވި މަގުމަތީ ނަޚްލާއޭ ކިޔުނު ހިސާބުގައި އެކަލޭގެފާނުގެ ޞަޙާބީބޭކަލުންނާއެކު ފަތިސްނަމާދު ކުރެއްވުމަށް ހުންނެވިއެވެ. އެކަލޭގެފާނުގެ ކިޔެވުން އަޑުއިވޭ ހިސާބަށް އެބައިމީހުންނަށް ފޯރުމާއެކު، ކިޔެވުމުގެ އަޑުއެހުމަށް މަޑުކުރުމަށްފަހު، އެބައިމީހުން އެއްބަޔަކު އަނެއްބަޔަކަށް ބުންޏެވެ. "ތިމަންމެނާ އުޑުގެ ޚަބަރުތަކާ ހުރަސްއަޅާކަމަކީ މިއީއެވެ." މިބައިމީހުން އީމާންވެ، މިބައިމީހުންގެ ޤައުމުގެ މީހުންގެ ގާތަށް އެނބުރިގޮސް ބުންޏެވެ. "ހަމަކަށަވަރުން، ތިމަންމެން ޢަޖާއިބުވާފަދަ ޤުރްއާނެއްގެ އަޑު އަހައިފީމުއެވެ. އެ ޤުރްއާން މަގުދައްކަނީ، ޙައްޤު ތެދުމަގަށެވެ. ފަހެ، ތިމަންމެން އެ ޤުރްއާނަށް އީމާންވެއްޖައީމުއެވެ. އަދި ތިމަންމެންގެ ވެރިރަސްކަލާނގެއާ އެއްވެސް އެއްޗެއް ތިމަންމެން ޝަރީކެއް ނުކުރާނަމެވެ."

މިވާހަކަ ވަނީ އިބްނު ޢައްބާސް رَضِيَ اللهُ عَنْهُمَا ގެ ކިބައިން އިމާމް ބުޚާރީއާއި އިމާމް މުސްލިމް ރިވާކުރައްވާފައެވެ. މިބައިމީހުން ޤުރްއާން އަޑުއެހިކަމެއް ނަބިއްޔާ صَلَّى اللهُ عَلَيهِ وَسَلَّم އަށްވެސް އަދި ޞަޙާބީބޭކަލުންނަށް އެނގިވަޑައެއް ނުގަންނަވައެވެ. މި ޙާދިސާގެ ޚަބަރުދެއްވުމުގެ ގޮތުން މާތް ﷲ سُوْرَةُ الجِنّ ބާވާލެއްވިއެވެ. އެ ސޫރަތުގައި އެބައިމީހުންގެ ޢަދަދުކަމުގައި ބަޔާންކުރައްވާފައި ވަނީ "نَفَر" އެވެ. އެއީ ޢަރަބިން ތިނަކާއި ދިހައަކާދެމެދުގެ ޢަދަދުތަކަށް ބޭނުންކުރާ ލަފްޒެކެވެ. މި ސޫރަތުގައި އެބައިމީހުންގެ ޤައުމުގެމީހުންގެ ގާތަށްގޮސް ދެއްކި ވާހަކަތަކުގެ ޚަބަރު މާތް ﷲ ދެއްވާފައިވެއެވެ. މި ޙާދިސާ ނޫނަސް ޖިންނިން ކީރިތި ޤުރްއާން އަޑުއެހި އެހެން ޙާދިސާތައް ވެއެވެ. އަޙްޤާފު ސޫރަތުގައިވެސް އޭގެ އެއް ޙާދިސާ ބަޔާންކޮށްދެއްވާފައިވެއެވެ. އަދި ޙަދީޘްތަކުގައިވެސް ޖިންނީންނަށް ދީނުގެ ކަންކަން އޮޅުންފިލުއްވައި ދެއްވުމަށް ނަބިއްޔާ صَلَّى اللهُ عَلَيهِ وَسَلَّم ސަހަރާ ތެރެއަށް ވަޑައިގެންނެވި ޙާދިސާތައް އައިސްފައިވެއެވެ. މާތް ﷲ އެކަލާނގެ އިރާދަކުރައްވާ އަޅަކަށް ހިދާޔަތުގެ ތެދުމަގު ދައްކަވައެވެ.