ޒުވާން އިމާމުންނަށާއި ޚަޠީބުންނަށް ފުރުޞަތު ދިނުމަށް، މަތީ ޘާނަވީ މަދަރުސާ ނިންމައިފިައި ތިބި ކަމަށް އެކަށޭނެ ކުދިންނަަށް އެކަމުގެ ހުއްދަ ދިނުމަށް އިސްލާމީ ކަންކަމާއި ބެހޭ ވަޒީރު ޑރ މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

ވަޒީރު ޑރ ޝަހީމް މިހެން ވިދާޅުވީ އޭނާ ކުރެއްވެވި ޓްވީޓެއްގައެވެ.

ޑރ ޝަހީމް ވިދާޅުވެފައިވަނީ ޒުވާން އިމާމުންނާއި ޚަޠީބުންނަށް ފުރުޞަތު ފަހިކޮށްދިނުމުގެ ގޮތުން ގްރޭޑް 10،11،12 ނިންމާފައިވާ ރީތިކޮށް ޤުރުއާންކިޔަވާ، ނަމާދުގެ ފިޤުހަށް އަހުލުވެރި ދަރިވަރުންނަށް އިމާމުވެ ހުކުރުކޮށް ޚުޠުބާކިއުމުގެ ހުއްދަ ދޭން މިނިސްޓްރީން ނިންމައިފި ކަމަށެވެ.

ރާއްޖެއަކީ މުސްލިމް ޤައުމަކަށްވާއިރު ރާއްޖޭގެ ރަށްރަށުގައި ޚަތީބުންގެ މިންބަރު ތަކުން އާންމުގޮތެއްގައި ފެންނަނީ އުމުރުން ދުވަސްވީ ބޭފުޅުންކަން ފާހަގަ ކޮށްލަންޖެހެއެވެ.

ނަމަވެސް މިފަހަކަށް އައިސް މާލޭގެ އިސްލާމީ މަރުކަޒުންގެ މިންބަރުން ޒުވާން ބޭފުޅުން ޚުތުބާ ދެއްވާ މަންޒަރު ދަނީ ފެންނަމުންނެވެ.

އެގޮތުން މިދިޔަ ހަފްތާގެ ހުކުުރު ދުވަހު އިސްލާމީ މަރުކަޒުގައި ޚުތުބާ ދީފައިވަނީ އަލް އުސްތާޒް މުޙައްމަދު ފިރުޒުލް އަހްމަދު ޙަލީލެވެ.