މާފަންނު މުރަނގަ މަގުގައި ހުންނަ "ކްލާސާ" ފިހާރަ ތެރޭގައި މީހަކު މަރާލި މައްސަލައިގައި ދެ މީހަކަށް ދައުވާ ކުރުމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ކްރިމިނަލް ކޯޓަށް ފޮނުވައިފިއެވެ.
ފިހާރަ ތެރެއަށް ބަޔަކު މީހުންވަދެ ހަމަލާދީ މަރާލާފައިވަނީ ސ. ހިތަދޫ، އިޒުމީރު، މުޙައްމަދު އަޙްމަދުދީދީ އެވެ.
މިކަމާ ބެހޭގޮތުން ޕީޖީ އޮފީހުން ނެރުނު ނޫސް ބަޔާނުގައި ބުނީ މުޙައްމަދު އަޙްމަދުދީދީ މަރުވި މައްސަލައިގައި ދަޢުވާ ކުރުމަށް 30 ނޮވެންބަރު 2023 ދުވަހު ކްރިމިނަލް ކޯޓަށް ހުށަހަޅާފައި ވާކަމަށެވެ.
މި މައްސަލައިގައި ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނު ގެ 5 ވަނަ މާއްދާގެ (ހ) އާ ޙަވާލާދީ، އެ މާއްދާގެ (ނ) ގެ ދަށުން، ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާ އުފުލާފައިވަނީ ސ. މަރަދޫފޭދޫ، ރަށްދެބައިގެ، އިބްރާހީމް ފައިޙް ނިޡާމު އާއި ތ. ގާދިއްފުށި، ގުލޭނޫރައްމާގެ، ސިރުޙާން ޢަލީގެ މައްޗަށެވެ.
މިއަހަރުގެ ފެބްރުއަރީމަހުގެ 24 ވަނަ ދުވަހު ހިނގި މި ޙާދިސާގައި މުޙައްމަދު އަޙްމަދުދީދީ "ކްލާސާ" ފިހާރައިގެ އެތެރޭގައި ހުއްޓާ ފިހާރަޔަށް ބަޔަކު ވަދެ، އޭނާއަށް ތޫނުއެއްޗަކުން ޙަަމަލާދީ ޒަޚަމްކޮށްލީ އެރޭގެ 21:30 ހާއިރުއެވެ.
އޭނާ މަރުވީ، ލިބުނު އަނިޔާތަކަށް އިންދިރާ ގާންދީ މެމޯރިއަލް ހޮސްޕިޓަލުގައި ފަރުވާދެމުން ދަނިކޮށެވެ.
Advertisement
This content is created and paid for by advertisers and does not involve Voice Journalists
