މަސްވެރިންނަށް ދޭން ހުރި ފައިސާގެ ތެރެއިން 136 މިލިއަން ވަނީ ދޫކުރެވިފައި ވާކަމަށް މިނިސްޓަރ އޮފް ފިޝަރީޒް އެންޑް އޯޝަން ރިސޯސަސް އަޙްމަދު ޝިޔާމް ވިދާޅުވެއްޖެއެވެ.

ޝިޔާމް މިފަދައިން ވިދާޅުވީ ރޭ ބޭއްވި މަސްވެރިންގެ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުންނެވެ.

ޝިޔާމް އިތުރަށް ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ޒައާމަތު ފެށިގެން ދިޔައީ މަސްވެރިންގެ ހުރި ބޮޑެތި ކަންބޮޑުވުން ތަކަކާއި އެކީގައި ކަމަށެވެ. ގައުމުގެ މާލީ ހާލަތު އޮތް ގޮތުން މަސްވެރިންނަށް ދޭން ހުރި ފައިސާ ނުދީ ގިނަ ދުވަސްތަކެއް ވެފައިވާކަމަށްވެސް މިނިސްޓަރ ފާހަގަ ކުރެއްވިއެވެ.

މިއީ އުނދަގޫ ދުވަސް ތަކެއް ނަމަވެސް މަސްވެރި އާއިލާތަކަށް ފައިސާ ނުލިބި ގިނަ ދުވަސް ވުމަކީ ވަަރަށް ގިނަ އުނދަގޫތަކެއް ތަހައްމަލް ކުރާންޖެހޭ ދުވަސްތަކެއްކަންވެސް ޝިޔާމްގެ ވާހަކަފުޅުގައި ފާހަގަ ކުރެއްވިއެވެ.

ރައީސް ޑރ.މުއިއްޒު ވެރިކަމާއި ހަވާލުވެވަޑައިގެން އިރު މަސްވެރިންނަށް 170 މިލިއަން ރުފިޔާ ވަނީ ދޭންޖެހިފައެވެ.

މަސްވެރިކަމުގެ ސިނާއަތަށް އިންގިލާބީ ބޮޑެތި ބަދަލުތަކެއް ގެނައުމަކީ ރައީސުލްޖުމްހޫރިއްޔާ ޑރ.މުއިއްޒުގެ ރިޔާސީ ވައުދުތަކުގެ ތެރޭގައި ހިމެނިވަޑައިގަންނަވާ ކަމަށް ވާއިރު، ވެރިކަމާއި ހަވާލުވެ ވަޑައިގަތުމަށް ފަހު މަސްވެރިކަމުގެ ސިޔާއަތު ކުރިއެރުވުމަށްޓަކައި އެންމެ އިސްކަންދީގެން ކުރައްވާނެ ގިނަ ކަންތައްތަކެއް ސަރުކާރުގެ ހަފްތާ-14 މަގުޗާޓުގައި ވެސް ވަނީ ހިމަނުއްވާފައި ވެއެވެ.