ރާއްޖޭގައި މުޅިން އަލަށް ފިޝަރީޒް ކޮލެޖެއް ޤާއިމް ކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިންމަވައިފިއެވެ.

މިފަދައިން އެމަނިކުފާނު ނިންމެވިކަމަށް ވިދާޅުވީ މިރޭ ކުރިއަށްދިޔަ މަސްވެރިންގެ ދުވަހުގެ ޖަލްސާގައި ވާހަކަފުޅު ދައްކަވަމުންނެވެ.

މި ގޮތުން ދިވެހިރާއްޖޭގެ ޤައުމީ ޔުނިވާސިޓީއާ ގުޅިގެން ރާއްޖޭގައި ފިޝަރީޒް ކޮލެޖެއް ޤާއިމުކުރުމުގެ އިދާރީ މަސައްކަތްތައް ހަފުތާ 14ގެ މި މުއްދަތުގެ ތެރޭގައި ހިނގަމުން ދާކަމަށް ރައީސް ޑރ.މުއިއްޒު ވިދާޅުވިއެވެ.

 އަދުގެ މަސްވެރީންގެ ތަޖުރިބާއާއި ޒުވާން މަސްވެރީންނަށް ފޯރަންވި ހުނަރާއި، އަދުގެ ދުނިޔޭގައި ކުރިއަރާފައިވާ ޤައުމުތަކުގައި އޮތް ފަންނިއްޔާތު ރާއްޖޭގެ މަސްވެރިކަމުގައި ޝާމިލްކުރުމަކީ ހާސިލްކުރައްވާނެ ހަޤީގަތެއް ކަަމަށާއި މިކަން ހާސިލް ކުރުމަށް މަސްވެރިންނަށް ތަފާތު ތަމްރީން ޕްރޮގްރާމްތައް ކުރިއަށް ގެންދިއުމަށް ނިންމަވާފައިވާކަން އެމަނިކުފާނު ވަނީ ފާހަގަ ކުރައްވާފައެވެ.

މީގެ އިތުރުންވެސް ރައީސް ޑރ.މުއިއްޒު ވިދާޅުވީ، ހަފުތާ 14 ގެ ވައުދުތަކުގެ ތެރެއިން، އެކުއަކަލްޗަރ ދާއިރާއަށް ބޭނުންވާ ހުނަރު ޒުވާނުންނަށް ދަސްކޮށްދީ، ހެޗަރީތައް ބިނާކޮށް، ކަނޑުގެ ދިރުން އާލާކުރުމުގެ ގާބިލުކަން ރާއްޖޭގައި އުފެއްދުމަށްޓަކައި، މެރީން ހެޗަރީ ސްކިލްސް ޑިވެލޮޕްމަންޓް ޕްރޮގްރާމްގެ ނަމުގައި ސިލްސިލާ ތަމްރީނުތަކެއް 2024 ވަނަ އަހަރުގެ ފެބްރުވަރީ މަހުގެ ތެރޭގައި ފަށާނެ ކަމަށެވެ.