މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން މާލޭ ސިޓީ ކައުންސިލް އިންތިހާބުގެ ކެމްޕެއިން ފަށައިފިއެވެ.

މިކަމާއި ބެހޭގޮތުން އެމްޑީޕީން އެކްސްގައި ކުރި ޕޯސްޓެއްގައި ބުނީ މާލޭ ސިޓީ މޭޔަރު އަދި ކައުންސިލްގެ ހުސްވެފައިވާ 3 ދާއިރާއަށް ވާދަކުރައްވާ މިޕާޓީގެ ކެންޑިޑޭޓުންގެ ކެމްޕޭން ރަސްމީކޮށް ސޯސަން ފެއްޓުމުގެ ޖަލްސާ ސޯސަން ޖަގަހައިގައި ބާއްވާފައިވާ ކަމަށެވެ.

 މި ޖަލްސާގައި ކުރީގެ ރައީސް އަދި އެމްޑީޕީގެ ރައީސް އިބްރާހީމް މުޙައްމަދު ޞާލިޙު ވަނީ ބައިވެރިވެވަޑައިގެންފައެވެ.

މާލެ ސިޓީގެ މޭޔަރު ކަމަށް އެމްޑީޕީގެ ޓިކެޓް ގައި ކުރިމަތިލައްވަނީ އެމްޓީސީސީގެ ކުރީގެ އެމްޑީ އާދަމް އާޒިމެވެ. އެބޭފުޅާ މިހާރު ދަނީ ހުޅުމާލެ އާއި މާލޭގެ ގެތަކަށް ވަޑައިގެން ކެމްޕެއިން ކުރައްވަމުންނެވެ.

އެމްޑީޕީގެ އިތުރުންވެސް މާލެ ސިޓީ ކައުންސިލްގެ އިންތިހާބުގައި ވާދަކުރައްވާނެ ކަމަށް ދެޕާޓީއަކުން ވަނީ އިއުލާން ކޮށްފައެވެ. އެއީ ޕީއެންސީގެ ފަރާތުން ކުރީގެ ބަންޑާރަ ނާއިބު އާއިޝަތު އާޒިމާ ޝަކޫރު، ދަ ޑިމޮކްރެޓްސްގެ ފަރާތުން މާލޭ ސިޓީގެ ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހް އެވެ. އަދި ރައީސް ޔާމީން އިސްކޮށް ހުންނަވައިގެން އުފައްދަވަން މަސައްކަތްކުރާ، ޕީޕަލްސް ނެޝަަނަލް ފްރަންޓުގެ ފަރާތުން މި އިންތިހާބުގައި ކުރީގެ ކޮމިޝަނާ އޮފް ޕޮލިސް ހުސައިން ވަހީދު ވާދަކުރައްވާނެ ކަން ވަނީ އިއުލާން ކޮށްފައެވެ. މީގެ އިތުރުންވެސް އަމިއްލަ ފަރާތަކުންވެސް މާލެ ސިޓީ ކައުންސލްގެ މޭޔަރު ކަމަށް ކުރިމަތިލުމަށް ވަނީ ހުށައަޅާފައެވެ.

މާލޭ ސިޓީގެ ހުސްވެފައިވާ މޭޔަރުގެ މަޤާމާއި، މެންބަރުން ހޮވުމަށް ބާއްވާ ބައި އިލެކްޝަން ބޭއްވުމަށް ހަމަ ޖެހިފައިވަނީ އަންނަ އަހަރުގެ ޖެނުއަރީ މަހުގެ 13 ވަނަ ދުވަހު އެވެ. އަދި މި އިންތިޚާބުގެ ރަސްމީ ނަތީޖާ އިއުލާނު ކުރާނީ ޖެނުއަރީ މަހުގެ 15 ދުވަހުއެވެ.