ރާއްޖޭގައި އިތުރު ދެ ބޭންކަކުން ފަވަރަގެ ޚިދުމަތް ދޭން ފަށައިފިއެވެ.

މިކަމާއި ގުޅިގެން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ނެރުނު ނޫސް ބަޔާނެއްގައި ބުނެފައިވަނީ އެމްއެމްއޭ އިން ކުރިޔަށް ގެންދާ މޯލްޑިވްސް ޕޭމަންޓް ސިސްޓަމް ޑިވެލޮޕްމަންޓް ޕްރޮޖެކްޓްގެ ދަށުން ޤާއިމްކޮށްފައިވާ އިންސްޓަންޓް ޕޭމަންޓް ސިސްޓަމް (އައިޕީއެސް) – ފަވަރަ ގައި އިތުރު ދެ ބޭންކަކުން މިއަދު ބައިވެރިވެފައި ވާކަމަށެވެ.

އަލަށް ފަވަރަގެ ހިދުމަތް ދޭން ފެށި ދެ ބޭންކަކީ ބޭންކް އޮފް ސިލޯން (ބީއޯސީ) އަދި މޮރިޝަސް ކޮމާޝަލް ބޭންކް (މޯލްޑިވްސް) ޕްރައިވެޓް ލިމިޓެޑް (އެމްސީބީ) އެވެ. އެ ބޭންކުތަކުން ފަވަރަ އާއި ގުޅުމަށް ވާންޖެހޭ އެންމެފަހުގެ ތައްޔާރީތައް ފުރިހަމަކޮށް ޕައިލަޓް ޓެސްޓިންގ ނިންމާފައިވާ ކަމަށް އެމްއެމްއޭ އިން ބުނެ އެވެ.

މި ސިސްޓަމް ގެ ސަބަބުން މިއަދުން ފެށިގެން، މި ދެ ބޭންކުގެ ކަސްޓަމަރުންނަށް ފަވަރަ ޓްރާންސްފަރ، ފަވަރަ ރިކުއެސްޓް، ފަވަރަ އައިޑީ އަދި ފަވަރަ ރީކޯލް ހިމެނޭހެން، ފަވަރަގެ އެންމެހާ ޚިދުމަތްތައް ލިބިގެންދާނެއެވެ.

މިއަދު މި ހިދުމަތާއި ގުޅުނު ދެ ބޭންކް ގެ އިތުރުން ބޭންކް އޮފް މޯލްޑިވްސް، މޯލްޑިވްސް އިސްލާމިކް ބޭންކް އަދި ސްޓޭޓް ބޭންކް އޮފް އިންޑިއާ ހިމެނޭހެން ރާއްޖޭގައި ހިދުމަތްދޭ ޖުމްލަ 5 ބޭންކެއް މެދުވެރިކޮށް ފަވަރަގެ ޚިދުމަތްތައް މިހާރު ލިބިގެންދާނެއެވެ.

ފަވަރަގެ ހިދުމަތަކީ ދިވެހިރާއްޖޭގައި ފަސޭހަ، އަވަސް، އަދި ރައްކާތެރި ޕޭމަންޓް ޚިދުމަތެއް ފޯރުކޮށްދިނުމަށް މަގުފަހިކުރުމުގެ ގޮތުން އެމްއެމްއޭ އިން ކުރިޔަށް ގެންދާ މޯލްޑިވްސް ޕޭމަންޓް ސިސްޓަމް ޑިވެލޮޕްމަންޓް ޕްރޮޖެކްޓްގެ ދަށުން ޤާއިމްކޮށްފައިވާ ހިދުމަތެކެވެ.