ސިޔާސީ ޕާޓީތަކަށް މެންބަރުންގެ ގޮތުގައި ދަފްތަރު ކުރުމަށް ސިޔާސީ ޕާޓީތަކުން ހުށަހަޅާ ފަރާތްތަކުގެ ފޯމު ދަފްތަރު ކުރުމުގެ ކުރިން އިލެކްޝަންސް ކޮމިޝަން(އީސީ) އިން ޝަކުވާއަށް ހުޅުވާލައިފިއެވެ.

އިލެކްޝަންސް ކޮމިޝަނުން ކޮށްފައިވާ އިއުލާނެއްގައި ބުނީ ސިޔާސީ ޕާޓީތަކަށް މެންބަރުންގެ ގޮތުގައި ދަފްތަރު ކުރުމަށް އެދި ފޯމު ހުށަހަޅާފައިވާ ފަރާތްތަކުގެ މޯބައިލް ނަންބަރަށް މެސެޖެއް ފޮނުވާފައި ވާނެ ކަމަށެވެ.

ސިޔާސީ ޕާޓީތަކަށް މެންބަރުންގެ ގޮތުގައި ދަފްތަރު ކުރުމަށް ސިޔާސީ ޕާޓީތަކުން ހުށަހަޅާ ފަރާތް ތަކުގެ ފޯމު ދަފްތަރު ކުރުމުގެ ކުރިން، ކޮމިޝަނަށް ހުށަހެޅިފައިވާ ފޯމުތަކަކީ ޞައްޙަ ފޯމުކަމުގައި ކަށަވަރު ކުރުމަށްޓަކައި އެ ކޮމިޝަނުން ކަނޑައަޅާފައިވާ އުސޫލުގެ ދަށުން، ފޯމުގައިވާ މަޢުލޫމާތުގެ ތެރެއިން އެފަރާތުގެ ފުރިހަމަ ނަމާއި ދިވެހި ރައްޔިތެއްކަން އަންގައިދޭ ކާޑުގެ ފަހު ތިން އަދަދާއި ދަފްތަރުކޮށްދިނުމަށް އެދި ހުށަހަޅާފައިވާ ޕާޓީގެ ނަން ހިމެނޭގޮތަށް ލިސްޓެއް ވަނީ އީސީގެ ވެބްސައިޓުގައި ވަނީ އާންމު ކޮށްފަ އެވެ.

Advertisement

މި އިޢުލާނާ އެކު ޝާއިއު ކުރެވިފައިވާ ލިސްޓުގައި ހިމެނިފައިވާ ފޯމުތަކުގެ ތެރެއިން 4770 ފޯމާއި އެކު އެންމެ ގިނަ ފޯމު ހުށައެޅީ ވެރިކަން ކުރާ މައި ޕާޓީ ޕީއެންސީންނެވެ. ދެން އެންމެ ގިނަ ފޯމު ހުށައަޅާފައިވަނީ އިދިކޮޅު އެމްޑީޕީންނެވެ. އެއީ 710 ފޯމެވެ. އަދާލަތު ޕާޓީން 221 ފޯމު ހުށައަޅާފައިވާއިރު އެމް.ޑީ.އޭއިން ވަނީ 58 ފޯމު ހުށައަޅާފައެވެ. އަދި އެމް.އެން.ޕީންވެސް 4 ފޯމެއް ވަނީ ސިޔާސީ ޕާޓީތަކަށް މެންބަރުންގެ ގޮތުގައި ދަފްތަރު ކުރުމަށް އެދި ހުށައަޅާފައެވެ.

އެ ކޮމިޝަނުން ޢާންމު ކޮށްފައިވާ ލިސްޓާ ގުޅޭގޮތުން އެއްވެސް ޝަކުވާއެއް ވާނަމަ، ޝަކުވާ ހުށައަޅާ ފޯމު މެދުވެރިކޮށް 17 ޑިސެންބަރު 2023 ވާ އާދީއްތަ ދުވަހުގެ މެންދުރު ފަހުގެ 3:00 ގެ ކުރިން އިލެކްޝަންސް ކޮމިޝަނުގެ މައި އިދާރާއަށް ވަޑައިގެން ފޯމު ހުށަހެޅުމަށް ނުވަތަ ކޮމިޝަނަށް މެއިލް ކުރުމަށް އީސީން ވަނީ އެދިފައެވެ.