އެންމެ ބޮޑު އަމާޒަކީ ގައިންގަޔަށް ނާރާ ބަލިތަކާއި ގުޅޭގޮތުން ރާއްޖޭގައި އެހީތެރިކަން ފޯރުކޮށްދޭ އެންޖީއޯތަކަށް އެހީތެރިވެެެދެއްވުންކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ވިދާޅުވެއްޖެއެވެ.
އެކަމަނާ މިފަދައިން ވިދާޅުވީ ސަންގުޓީވީ އަށް ދެއްވި ބަސްދީގަތުމެއްގައެވެ.
މެޑަމް ސާޖިދާ ވިދާޅުވީ އިޖްތިމާއީ ދާއިރާއިން މަސައްކަތްކުރައްވާ ހިދުމަތްކުރެއްވުމުގެ ވިސްނުންފުޅު އަބަދުވެސް ގެންގުޅުއްވާ ކަމަށެވެ. އަދި އެ ދާއިރާގައި ގިނަ އަހަރު މަސައްކަތްކުރައްވާފައި ހުންނެވުމުގެ ސަބަބުން އެފަދަ މަސައްކަތްތަކުގައި އުޅޭ ޖަމިއްޔާތަކާއެކު ކުރިޔަށް ދިއުމަށް ފަސޭހަވާނެކަމަށް ވެސް އެކަމަނާ ވިދާޅުވިއެވެ.
"ބޮޑަށް އަޅުގަނޑު ބޭނުންވަނީ އެންސީޑީ، ގައިން ގަޔަށް ނާރާ ބަލިތަކަށް ގުޅޭ ގޮތުން ބޮޑަށް ފޯކަސް ކުރަމުން އަޅުގަނޑު މިދަނީ. އަޅުގަނޑުގެ މައުލޫމާތު ހުރީ ބޮޑަށް އެ ދާއިރާ ވީމަ އަޅުގަނޑަށް އެދާއިރާގައި މަސައްކަތް ކުރަން ފަސޭހަ ވާނެ. އެހެންވީމަ ހަމަ އެގޮތަށް މި ވިސްނަނީ. އެހެންނަމަވެސް އޭގެ މާނައެއްނޫން އެހެން އެންޖީއޯތަކާއި އެކީގައި މަސައްކަތް ނުކުރާނެއޭ. ހަމަ ކުރާގޮތަށް."
ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު
މީގެ އިތުރުން އެކަމަނާ ވަނީ އެންޖީއޯތަކާއި ބައްދަލުކުރެއްވިއިރު އެ ފަރާތްތަކުން ފާހަގަކުރެެއްވި ކަންބޮޑުވުންތައް ހިއްސާ ކުރައްވާފައެވެ. އޭގެ ތެރޭގައި ޖަމިޔާތަކަށް ދިމާވެފައިވާ އެންމެ ބޮޑު ދަތިކަމަކީ އޮފީސްތައް ހިންގުމުގެ ޖާގައިގެ މައްސަލަކަން ފާހަގަކުރައްވާ، ޖަމިއްޔާތަކުގެ ހިންގުމަށް އޮފީސް އިމާރާތެއް ނެތުމުގެ ސަބަބުން ގޭތެރޭގައި އިދާރީ ކަންކަން ކުރިޔަށް ގެންދަން ޖެހިފައިވާކަމަށް ވިދާޅުވިއެވެ.
މެޑަމް ސާޖިދާ މިއަދު ވަނީ ތެލެސީމިއާ އެސޯސިއޭޝަނާއި ބައްދަލުކުރައްވަފައި، އެ ބޭފުޅުންގެ ދަތިތައް ހައްލު ކުރުމަށް އެހީތެރިކަން ފޯރުކޮށްދިނުމާއި ބެހޭގޮތުން ވެސް މަޝްވަރާކުރައްވާފައެވެ.
އެހެންކަމުން އަމާޒަކީ ރާއްޖޭގައި ހަރާކާތްތެރިވަމުންދާ އެކި ޖަމިއްޔާތަކާއެކު ގުޅިގެން ކުރިޔަށް ވަޑައިގެންނެވުންކަމަށް މެޑަމް ސާޖިދާ ވިދާޅުވިއެވެ.
Advertisement
This content is created and paid for by advertisers and does not involve Voice Journalists
