އެންޖީއޯތަކާއި ބައްދަލުކުރައްވާ، ކަންބޮޑުވުންތައް އަޑުއައްސަވާ، މައްސަލަތައް ހައްލުކޮށްދެއްވަން ވަރަށް ބޮޑަށް ބޭނުންފުޅުވާކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އަނބިކަނބަލުން ސާޖިދާ މުހައްމަދު ވިދާޅުވެއްޖެއެވެ.
އެ ކަމަނާ މިފަދައިން ވިދާޅުވީ ސަންގު ޓީވީއަށް ދެއްވި ބަސްދީގަތުމެއްގައެވެ.
"އިޖްތިމާޢީ ދާއިރާގައި މަސައްކަތް ކުރުމުގެ ވިސްނުން އަބަދުވެސް ހުރޭ. އެގޮތުން އެފަދަ އެންޖީއޯތަކާއި ބައްދަލުކޮށް ކަންބޮޑުވުންތައް އަޑުއަހާ ހައްލުކޮށް ދިނުމުގެ މަސައްކަތް ކޮށްދޭން ވަރަށް ބޮޑަށް ބޭނުން"
ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު
މީގެ އިތުރުން އެ ކަމަނާ ވިދާޅުވީ ރިކުއެސްޓް ކުރަމުންދާ ފަރާތްތަކާ މިހާރު ބައްދަލުކުރައްވަމުން ގެންދަވާ ކަމަށާއި އެ ފަރާތްތަކުގެ ކަންބޮޑުވުންތައް އޮޅުންފިލުއްވަމުން ގެންދަވާ ކަމަށެވެ. އަދި ބޭނުންފުޅުވަނީ އެ ފަރާތްތަކުގެ ބޭނުންތަކަށް އެހީ ފޯރުކޮށްދެއްވުމަށް ކަމަށް ވެސް މެޑަމް ސާޖިދާ ވިދާޅުވިއެވެ.
ރާއްޖޭގައި އެކި ދާއިރާތަކުގައި މަސައްކަތް ކުރާ އެންޖީއޯތައް އެބަހުރި ކަމަށާއި ބޭނުންފުޅުވަނީ ވަކި އެންޖީއޯއެއް އުފެއްދުމުގެ ބަދަލުގައި، އެ ހުރިހާ އެންޖީއޯތަކަށް ވެސް އެ ކަމަނާގެ އެއްބާރުލުން ލިބޭނެ ގޮތަކަށް މަސައްކަތްތައް ބައްޓަން ކުރައްވަން ކަމަށް މެޑަމް ސާޖިދާ ވިދާޅުވިއެވެ.
އަދި މެޑަމް ސާޖިދާގެ ދާއިރާ ކަމުގައިވާ ކާބޯތަކެއްޗާއި ގުޅޭގޮތުން މީހުން ހޭލުންތެރި ކުރުމަށް ވަރަށް ބޮޑަށް ވިސްނަވާފައިވާކަމަށް ވެސް އެކަމަނާގެ ވާހަކަފުޅުގައި ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
