އިންސާނީ ހައްޤުތައް ކަށަވަރުކުރުމަށް 5 ކަމަކަށް ރާއްޖެއިން ވަޢުދުވެއްޖެއެވެ.

މި ވަޢުދުތައް އިއްވަވައިފައިވަނީ “ހިޔުމަން ރައިޓްސް 75” ފާހަގަ ކުރުމަށް ބޭއްވި “ޕްލެޖިންގް ޓްރީ ސެޝަން” ގައި ރާއްޖެގެ ނައިބު ރައީސް ހުސެއިން މުޙައްމަދު ބައިވެެރިވެވަޑައިގެންނެވެ.

ނައިބުރައީސް ހުސެއިންގެ ވާހަކަފުޅުގައި ރާއްޖޭގައި އިންސާނީ ޙައްޤުތައް ނެގެހެއްޓުމުގެ ސަގާފަތް އާލާކުރުމަށްޓަކައި މި ދާއިރާއިން މީހުން ބިނާކުރުމަށް މިހާރުގެ ސަރުކާރުން ދޭ އަހަންމިއްޔަތު ފާހަގަކުރެއްވިއެވެ.

ނައިބުރައީސް ހުސެއިން ވަނީ އިންސާނީ ހައްޤުތަކާ ގުޅޭގޮތުން އެކުލަވާލާފައިވާ ދިވެހިރާއްޖޭގެ އޮނިގަނޑުތައް ބައިނަލްއަޤްވާމީ މިންގަނޑުތަކާ އެއްގޮތަށް ދެމެހެއްޓުމަށާއި، ބައިނަލްއަޤްވާމީ މުޢާހަދާތަކަށް އަމަލުކުރާ ގޮތާމެދު މައުލޫމާތު ދިނުމުގެ ނިޒާމު އިތުރަށް ހަރުދަނާ ކުރުމަށް ވަޢުދުވެވަޑައިގެންފައެވެ.

އަދި ހަމައެހެނެމެ އިންސާނީ ޙައްޤުތައް ނެގެހެއްޓުމަށް އުފައްދާފައިވާ ބައިނަލްއަޤްވާމީ އެކިއެކި ނިޒާމުތަކާއެކު އިތުރަށް ގުޅުން ބަދަހި ކުރުމަށް މިހާރުގެ ސަރުކާރުން ކެނޑިނޭޅި މަސައްކަތް ކުރައްވަމުން ގެންދަވާނެކަމަށް ދިވެހިރާއްޖޭގެ ފަރާތުން ވަޢުދު ވެވަޑައިގެންފައެވެ.

ހަމަމިއާއި އެކު މުޖުތަމައުގައި ފަރުދީގޮތުން އަދާކުރާ ދައުރާއި ސިޔާސީ މައިދާނުގައި ހަރަކާތްތެރިވުމުގައި އަންހެނުންނާއި އަންހެން ކުދިންނަށް ހަމަހަމަ ފުރުސަތުތަކެއް ފަހިކޮށްދިނުމަށް ދިވެހިރާއްޖެއިން ވަޢުދުވާކަން  ނައިބުރައީސް ބަޔާންކުރެއްވިއެވެ.

އަދި އެއްވެސް ކުއްޖެއް ބާކީނުކޮށް ހަމަހަމަ ގޮތެއްގައި ތަޢުލީމު ހޯދުމަށް މަގުފަހިކޮށްދިނުމަށާއި ކުޑަކުދިންގެ ރައްކާތެރިކަމަށް ޤައުމީ ފެންވަރުގައި އެކަށައަޅާފައިވާ ނިޒާމުތައް އިތުރަށް ހަރުދަނާކުރުމަށްވެސް ރާއްޖެއިން ވަޢުދުވާކަމުގައި އެމަނިކުފާނު ވިދާޅުވިއެވެ.

އެންމެފަހު ވަޢުދެއްގެ ގޮތުން ނައިބު ރައީސް ވަނީ މޫސުމަށް އަންނަ ބަދަލުތަކާއި ދިވެހިންގެ އިންސާނީ ޙައްޤުތަކާ ގުޅިލާމެހިފައިވާކަން ފާހަގަކުރައްވައި، ދިވެހިންގެ ދިރިއުޅުމުގެ ވައްޓަފާޅިއާއި ދިވެހިންގެ މުސްތަޤްބަލު ކަށަވަރު ކުރުމަށްޓަކައި މޫސުމަށް އަންނަ ބަދަލުތަކަށް ވިލުންވެރިކަން އިތުރުކުރުމަށް ރާއްޖެއިން މަސައްކަތްކުރާނެކަން ފާހަގަކުރައްވާފައެވެ.

ސްވިޒަރލެންޑްގެ ޖެނީވާގައި ބޭއްވި މި ހަރަކާތުގައި ރާއްޖެއިން ވަނީ މައިގަނޑު 5 ކަމަކަށް ވަޢުދުވެފައެވެ.މެންބަރު ޤައުމުތަކުން މާނަހުރި ކަންތައްތަކެއް ކުރުމަށް ބާރުއެޅުމުގެ ގޮތުން އ.ދ.ގެ އިންސާނީ ޙައްޤުތަކާބެހޭ ހައިކޮމިޝަނަރުގެ އޮފީހުން އިންތިޒާމުކޮށްގެން ކުރިއަށްގެންދާ މި ކެމްޕެއިންގައި، 100 އަށްވުރެ ގިނަ މެންބަރު ޤައުމުން ވަނީ އެޤައުމުތަކުން ވަޢުދުވާ ކަންކަން ހުށަހަޅާފައެވެ.