ވެރިކަންކުރާ ޕީއެންސީގެ ޓިކެޓްގައި މާލެ ސިޓީ ކައުންސިލްގެ މޭޔަރު ކަމަށް ވާދަކުރައްވާ ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރު، މޭޔަރ ކަމަށް ވާދަކުރައްވުމަށް އެދި، އިލެކްޝަންސް ކޮމިޝަނަށް ފޯމު ހުށަހަޅުއްވައިފި އެވެ.
ޢާޒިމާގެ އިތުރުން ޕީއެންސީގެ ޓިކެޓްގައި މާލެސިޓީ ކައުންސިލްގެ ހުސްވެފައިވާ މެންބަރު ކަމުގެ މަގާމަށްވެސް ޕީއެންސީގެ ޓިކެޓްގައި ވާދަކުރައްވާ ކެންޑިޑޭޓުން މިއަދު އީސީއަށް ވަނީ ފޯމު ހުށަހަޅުއްވާފައެވެ.
ޢާޒިމާ މޭޔަރ ކަމުގެ ފޯމު އީސީއަށް ހުށަހަޅަނީ-- ފޮޓޯ/ވޮއިސް
އީސީއަށް ފޯމު ހުށަހެޅުއްވުމަށްފަހު، ނޫސްވެރިންނާއި ބައްދަލު ކުރައްވާ ވާހަކަ ދައްކަވަމުން ޢާޒިމާ ވިދާޅުވީ, އޭނާ އާއި އަދި ޕީއެންސީގެ ޓިކެޓްގައި ދެންވެސް ވާދަކުރައްވާ ކެންޑިޑޭޓުން ނުކުންނަވަނީ ސަރުކާރުގެ ސިޔާސަތުގެ ތެރޭއިން މާލެ ސިޓީ އަށް ޚާއްސަ ކުރެވިފައިވާ ސިޔާސަތު ތައް ތަންފީޒް ކުރައްވައި، އެކަމުގައި ސަރުކާރަށް އެއްބާރުލުން ދެއްވުމަށް ކަމަށެވެ.
ޢާޒިމާ މޭޔަރ ކަމުގެ ފޯމު އީސީއަށް ހުށަހެޅުން-- ފޮޓޯ/ވޮއިސް
އަދި، ކުރިއަށް އޮތް އިންތިޚާބުގައި ޕީއެންސީގެ ކެންޑިޑޭޓުންނަށް ވޯޓު ދެއްވައި އެކަމަށް މަގުފަހިކޮށްދެއްވުމަށް ޢާޒިމާ ވަނީ އެދިވަޑައިގެންފަ އެވެ.
މޭޔަރ ކަމަށް ވާދަކުރައްވަން ޢާޒިމާ ފޯމް ލައްވާފައިވާއިރު، އޭނާ އަންނަނީ މޭޔަރ ކަމުގެ ކެންޕެއިން ހަރަކާތްތައްވެސް ވަރަށް ފޯރީގައި ކުރިއަށް ގެންދަވަމުންނެވެ. އެގޮތުން މާލެ ސިޓީއާއި، ވިލިމާލޭ އާއި ހުޅުމާލޭގައިވެސް ދޮރުން ދޮރަށް ކެންޕެއިން ހަރަކާތްތައް އަންނަނީ ހިންގަވަމުންނެވެ.
އަދި މީގެ އިތުރުން ރައްޔިތުންގެ ހާލު ގާތުން ބައްލަވައި، ޝަކުވާތައް އަޑު އެއްސެވުމަށް، އާއްމުން އެއްވެ އުޅޭ ތަންތަނަށްވެސް އަންނަނީ ޒިޔާރަތް ކުރައްވަމުންނެވެ.
މި އިންތިޚާބުގައި ޢާޒިމާގެ އިތުރުން އެމްޓީސީސީގެ ކުރީގެ ސީއީއޯ އާދަމް ޢާޒިމް އާއި މާލެ ސިޓީ ކައުންސިލްގެ ކައުންސިލަރ ސައިފް ފާތިހްވެސް ވާދަކުރައްވައެވެ.
Advertisement
This content is created and paid for by advertisers and does not involve Voice Journalists
