ކުރީގެ ރައީސް އިބްރާހީމް މުޙައްމަދު ޞާލިޙްގެ މޮޓޯކޭޑަށް ހުރަސްއެޅި މައްސަލައިގައި ހައްޔަރުކުރި މީހަކު ބަންދުން ދޫކޮށްލައިފިއެވެ.

މި މައްސަލައިގައި ހައްޔަރުކޮށް ދޫކޮށްލައިފައިވަނީ ހއ.ހޯރަފުށްޓަށް ނިސްބަތްވާ 37 އަހަރުގެ ފިރިހެނެކެވެ.

އޭނާގެ ބަންދާމެދު ގޮތެއް ނިންމަން އިއްޔެ ވަނީ ކްރިމިނަލް ކޯޓަށް ހާޒިރުކުރުކޮށްފައެވެ. އަދި ކޯޓުން ވަނީ އޭނާ ބަންދުން ދޫކޮށްލައިފައެވެ.

20 މާރިޗު 2023 ދުވަހުގެ ރޭގަނޑުގެ ވަގުތެއްގައި ބޮޑުތަކުރުފާނުމަގު ޗީބޯ ކެފޭ ކައިރިން ކުރީގެ ރައީސް ޞާލިޙް ދަތުރުފުޅުކުރައްވަމުން ގެންދެވި މޮޓޯކޭޑް އަށް ހުރަސްއަޅައި އަޑުގަދަކޮށް އާއްމު މަސްލަހަތު ނަގާލައި ފުލުހުންގެ ދައުރު އަދާކުރުމަށް ހުރަސްއެޅިކަމަށް ތުހުމަތުކޮށް އެހެން މައްސަލައިގައި 5 މީހެއްގެ މައްޗަށް ވެސް ދައުވާކުރަން ވަނީ ކްރިމިނަލް ކޯޓަށް ހުށަހަޅާފައެވެ.

އެ މައްސަލާގައި ދައުލަތުގެ މަސައްކަތްތަކަށް ހުރަސްއެޅުމުގެ ކުށުގެ ދައުވާ އުފުލާފައިވަނީ ހުޅުމާލެ 11328 ގޯތި, މުޙައްމަދު ޢައްބާސާއި, ދަފްތަރު ނަންބަރު ރސ 9151 އަޙްމަދު ރަޝީދާއި, ހުޅުމާލެ ފްލެޓް 06-2-154 އަޙްމަދު ޢަޒީލްގެ މައްޗަށެވެ. އެ މީހުންގެ މައްޗަށް އެ ދައުވާކުރަން ހުށަހެޅީ 31 މޭ 2023 ގައެވެ.

މީގެއިތުރުން ހަމަ މިމައްސަލައިގައި ގއ.ދެއްވަދޫ އެސްޓަންވިލާ އަޙްމަދު ސިނާންއާއި ށ.ބިލެތްފަހި ސޭޑީކޯނަރ މަރްޔަމް މާޝާގެ މައްޗަށް އާންމު މަސްލަހަތަށް ގެއްލުންހުރި އަމަލެއް ކުރުމުގެ ކުށުގެ ދައުވާއާއި ދައުލަތުގެ މަސައްކަތްތަކަށް ހުރަސްއެޅުމުގެ ކުށުގެ ދައުވާ ކުރަން ހުށަހެޅީ 16 މޭ 2023 ގައެވެ.