ރާއްޖޭގައި އަލަށް ގާއިމްކުރާ މަލްޓި-ސްޕީޝީސް ހެޗަރީގެ ބިންގާ އަޅައިފި
ރާއްޖޭގައި އަލަށް ގާއިމްކުރާ މަލްޓި-ސްޕީޝީސް ހެޗަރީގެ ބިންގާ ގއ. މާނަގަލާގައި އަޅައިފިއެވެ.
އެމާއި ފާނަ އަދި ހުއިފިލަނޑާ އާލާކުރުމަށް ތަރައްގީކުރާ މަލްޓި-ސްޕީޝީސް ހެޗަރީގެ ބިންގާ މިއަދު އަޅުއްވައިދެއްވީ މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސްގެ ޑެޕިއުޓީ މިނިސްޓަރު އަހުމަދު ޝާފިއު އާއި ހުވަދުއަތޮޅު އުތުރުބުރީ ކައުންސިލްގެ ރައީސް އިބްރާހީމް ޝަހީންއެވެ.
މިކަމާއި ގުޅިގެން ފިޝަރީޒް މިނިސްޓްރީން ބުނީ އަމާޒަކީ މި ހެޗަރީގައި 2024 ވަނަ އަހަރުގެ ފަހުކޮޅު އެމުގެ ފުރަތަމަ ބެޗް އުފެއްދުން ކަމަށެވެ.
"ގއ. މާނާގަލާގައި ޤާއިމުކުރާ ހެޗަރީގައި އެކިބާވަތުގެ ކަނޑުގެ ދިރުންތައް އާލާކުރެވިގެން ދާނެ. އޭގެ ތެރޭގައި ފާނައާއި ހުއިފިލަނޑާ އަދި ދިރޭ އެމުގެ ގޮތުގައި ބޭނުން ކުރެވިދާނެ ބާވަތެއް ކަމަށްވާ ބޭންގު ހިމެނޭ. އަމާޒަކީ 2024 ވަނަ އަހަރުގެ ފަހުކޮޅު އެމުގެ ފުރަތަމަ ބެޗް އުފެއްދުން."
މިނިސްޓްރީން ބުނެއެވެ.
މި ޕްރޮޖެކްޓް ހިންގަނީ މި ކަމުގެ ތަޖުރިބާ ހުރި ކުންފުންޏެއްކަމުގައިވާ ދުބާއީގެ އެކުއާ ބްރިޖް ގްރޫޕުންނެވެ. އެތަން ހިންގުން އެ ކުންފުންޏާއި ހަވާލުކޮށްފައިވަނީ 20 އަހަރުގެ މުއްދަތަކަށެވެ.
ދެ ފިޔަވައްސަކަށް ބަހާލައިގެން ކުރިއަށްގެންދާ މި މަޝްރޫއުގެ ތެރެއިން ފުރަތަމަ ފިޔަވަހީގައި ހެޗަރީއަށް ބޭނުންވާ ސަޕޯޓް އިންފްރާސްޓްރަކްޗަރ ގާއިމްކޮށް، ދެވަނަ ފިޔަވަހީގައި ހެޗަރީއަށް ބޭނުންވާ އުމްރާނީ ތަރައްގީގެ ތެރޭގައި ހިމެނޭ ނާސަރީތަކާއި ލައިވް ފީޑް ޕްރޮޑަކްޝަން ފެސިލިޓީތަކާއި ލެބޯޓަރީތަކާއި މޫދު ކޮށިތައް ޤާއިމުކުރާނެކަމަށް ފިޝަރީޒް މިނިސްޓްރީން މައުލޫމާތުދެއެވެ.
Advertisement
This content is created and paid for by advertisers and does not involve Voice Journalists