ކުރިއަށް އޮތް މާލެސިޓީ ކައުންސިލްގެ އިންތިހާބުގައި މޭޔަރުކަމުގެ ބައި-އިލެކްޝަންގައި ވާދަކުރެއްވުމަށް މާލެ ސިޓީ ކައުންސިލްގެ ގަލޮޅު އުތުރު ދާއިރާގެ ކައުންސިލް މެންބަރު މުހައްމަދު ސައިފު ފާތިހު އިލެކްޝަންސް ކޮމިޝަން (އީސީ) އަށް ފޯމް ހުށަހަޅުއްވައިފިއެވެ.
ޑިމޮކްރެޓްސްގެ ޓިކެޓްގައި މާލެސިޓީ މޭޔަރު ކަމަށް ވާދަކުރެއްވުމަށް ސައިފް ފޯމު ހުށަހަޅުއްވާފައިވަނީ މިއަދު މެންދުރުގެ ވަގުތެއްގައެވެ.
ސައިފްގެ ފޯމާއި އީސީގެ ފަރާތުން ހަވާލުވެވަޑައިގަތީ އެ ކޮމިޝަންގެ ނައިބު ރައީސް އިސްމާއީލް ހަބީބެވެ.
މިއާއެކު ހަތަރު ސިޔާސީ ޕާޓީއަކުން މި އިންތިހާބުގައި ވާދަކުރާނެ ކަމަށް ވަނީ އިއުލާންކޮށްފައެވެ. އެއީ އެމްޑީޕީގެ ފަރާތުން އެމްޓީސީސީގެ ކުރީގެ ސީއީއޯ އާދަމް އާޒިމް، ޕީއެންސީގެ ފަރާތުން ކުރީގެ ބަންޑާރަ ނައިބު އާއިޝަތު އާޒިމާ ޝަކޫރު، ދަ ޑިމޮކްރެޓްސްގެ ފަރާތުން މާލޭ ސިޓީގެ ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހް އެވެ. އަދި ރައީސް ޔާމީން އިސްކޮށް ހުންނަވައިގެން އުފައްދަވާފައިވާ ޕީއެންއެފްގެ ފަރާތުން މި އިންތިހާބުގައި ކުރީގެ ކޮމިޝަނަރ އޮފް ޕޮލިސް ހުސައިން ވަހީދު ވާދަކުރައްވާނެކަން ވަނީ އިއުލާންކުރައްވާފައެވެ. މީގެ އިތުރުން އަމިއްލަ ފަރާތަކުން ވެސް މި އިންތިހާބުގައި ބައިވެރިވުމަށް ފޯމު ހުށަހަޅާފައިވާކަމަށް އީސީއިން މައުލޫމާތުދެއެވެ.
މާލެސިޓީގެ މޭޔަރު ކަމުގެ މަގާމު ހުސްވީ އެ މަގާމުގައި ހުންނެވި ޑރ. މުހައްމަދު މުއިއްޒު ރިޔާސީ އިންތިހާބު ކާމިޔާބުކުރައްވާ ރައީސުލްޖުމްހޫރިއްޔާ ކަމަށް އިންތިހާބުވެވަޑައިގެންނެވުމާ ގުޅިގެންނެވެ.
މާލޭ ސިޓީގެ ހުސްވެފައިވާ މޭޔަރުގެ މަޤާމާއި ހުސްވެފައިވާ ބައެއް ގޮނޑިތަކަށް މެންބަރުން ހޮވުމަށް ބައި އިލެކްޝަން ބޭއްވުމަށް ހަމަޖެހިފައިވަނީ އަންނަ އަހަރުގެ ޖެނުއަރީ މަހުގެ 13 ވަނަ ދުވަހުއެވެ.
Advertisement
This content is created and paid for by advertisers and does not involve Voice Journalists
