އިންޓަނޭޝަނަލް އެއިޑް ކެންޕެއިން (އައިއޭސީ) އިން ދިވެހިންގެ އެހީގައި ޣައްޒާއަށް އެހީގެ ޤާފިލާއެއް ފޮނުވައިފިއެވެ.

މިކަމާއި ގުޅޭގޮތުން އައިއޭސީން ކުރި ޕޯސްޓެއްގައި ބުނީ މި ޤާފިލާގައި 1000 ކާބޯތަކެތީގެ ޕެކޭޖު ހިމެނޭ ކަމަށެވެ.

އަދި މި މަސައްކަތުގައި އެކި ގޮތްގޮތުން އެހީތެރިކަން ފޯރުކޮށްދޭ ހުރިހާ ފަރާތްތަކަށް އައިއޭސީއިން ވަނީ ޝުކުރު އަދާކޮށްފައެވެ.

Advertisement

އައިއޭސީއިން ބުނީ ޣައްޒާގެ ރައްޔިތުންނަށް އެންމެ ބޭނުންވާ އެހީތެރިކަން ފޯރުކޮށްދިނުމަށް މަސައްކަތްކުރަމުންދާ ކަމަށެވެ. 

އެގޮތުން ޣައްޒާގައި ހާލުގައި ޖެހިފައިވާ ރައްޔިތުންނަށް ދާދި ފަހުން ވެސް 1200 ފުޑް ޕެކޭޖް ބެހުމުގެ އިތުރުން 100 އާއިލާއަކަށް 500 ޑޮލަރުގެ މަގުން ފައިސާ ހަދިޔާކޮށްފައިވާކަމަށް އެ ޖަމިއްޔާއިން ބުނެއެވެ.

އޮކްޓޫބަރު މަހުގެ 7 ވަނަ ދުވަހު ހައްދުފަހަނަ އަޅާފައިވާ އިސްރާއީލުން ޣައްޒާއަށް ދޭންފެށި ހަމަލާތަކުގައި މިހާތަނަށް 18,000 ވުރެ ގިނަ ފަލަސްތީނުގެ ރައްޔިތުން ޝަހީދުވެފައިވާއިރު، އެތައް ބަޔަކު ވަނީ ޒަހަމްވެފައެވެ. މި ހަނގުރާމައިގެ ސަބަބުން ޣައްޒާގެ 2.3 މިލިއަން ރައްޔިތުންގެ ތެރެއިން 80 އިންސައްތައަށް ވުރެ ގިނަ މީހުންވަނީ ގެދޮރު ދޫކޮށް ގޮސްފައެވެ. ފަލަސްތީނުގެ ރައްޔިތުންނާމެދު އިސްރާއީލުން ކުރިއަށްގެންދާ ލާއިންސާނީ އަނިޔާވެރިކަން ހުއްޓާލުމަށް ދުނިޔޭގެ އެކި ކަންކޮޅުތަކުގައި އަންނަނީ އަޑު އުފުލަމުންނެވެ.

.