ނައިބުރައީސް ހުސެއިން މުޙައްމަދު ލަތީފް ޗައިނާ އަށާއި ސްވިޒަރލޭންޑަށް ކުރެއްވެވި ދަތުރުފުޅު ނިންމަވައިލައްވައި މާލެ ވަޑައިގެންފިއެވެ.

ނައިބުރައީސްއަށް ވެލާނާ އިންޓަރނޭޝަނަލް އެއަރޕޯޓުން މަރުޙަބާ ދަންނަވައިފައިވަނީ ސަރުކާރުގެ ބައެއް ވަޒީރުންނާއި ސަރުކާރުގެ ބައެއް އިސްވެރިންނެވެ.

ނައިބު ރައީސް ހުސެއިން ޗައިނާ އަށާއި ސްވިޒަރލޭންޑަށް މިކުރެއްވެވި ދަތުރުފުޅުގެ ތެރެއިން ޗައިނާއަށް ވަޑައިގެންނެވީ ޗައިނާ އިންޓަނޭޝަނަލް ޑިވެލޮޕްމަންޓް ކޯޕަރޭޝަން އެޖެންސީ އިން އިންތިޒާމުކޮށްގެން ބޭއްވި "ޗައިނާ-އިންޑިއަން އޯޝަން ރީޖަން ފޯރަމް އޮން ޑިވެލޮޕްމަންޓް ކޯޕަރޭޝަން" ގައި ވެސް ބައިވެރިވެވަޑައިގެންފައިވެއެވެ.

ޗައިނާއަށް ކުރެއްވެވި ދަތުރުފުޅުގެ ތެރެއިން ރާއްޖެ އާއި ޗައިނާއާއި ދެމެދު ގުޅުން ބަދަހިކުރެވިދާނެ ކަންކަމާއި ބެހޭގޮތުން ބައެއް މަޝްވަރާ ތައް ކުރައްވައިފައިވެއެވެ.

ޗައިނާ އަށް ކުރެެއްވެވި ދަތުރުފުޅު ނިންމަވައި ލައްވައި ނައިބުރައީސް ހުސެއިން ދެން ވަޑައިގަތީ ސްވިޒަލޭންޑަށެވެ.

އެ ދަތުރުފުޅަކީ، އިންސާނީ ޙައްޤުތައް ރައްކާތެރިކުރުމާބެހޭ ބައިނަލްއަޤްވާމީ މުއާހަދާ، "ޔުނިވަރސަލް ޑިކްލަރޭޝަން އޮފް ހިއުމަން ރައިޓްސް" އަށް 75 އަހަރު ފުރުމުގެ މުނާސަބަތު "ހިއުމަން ރައިޓްސް 75" ފާހަގަކުރުމަށްޓަކައި ބޭއްވި މަތީ ފަންތީގެ ހަރަކާތްތަކުގައި ބައިވެރިވެވަޑައިގަތުމަށް ކުރެއްވި ދަތުރުފުޅެކެވެ.

މިދަތުރުފުޅުގެ ތެރެއިން ސްވިޒަރލެންޑްގެ ޖެނީވާގައި ކުރިއަށްދިޔަ "ހިއުމަން ރައިޓްސް 75"ގެ މަތީ ފަންތީގެ ހަރަކާތްތަކުގެ ޕެނަލް ޑިސްކަޝަން ހުޅުވުމުގެ ރަސްމިއްޔާތުގައި ނައިބުރައީސް ބައިވެރިވެވަޑައިގެންފައިވެއެވެ.

އަދި މި ޕެނަލް ޑިސްކަޝަންގައި ވާހަކަފުޅު ދައްކަވަމުން އެމަނިކުފާނު ވަނީ، އިންސާނީ ޙައްޤުތައް ރައްކާތެރިކުރުމާބެހޭ ބައިނަލްއަޤްވާމީ މުއާހަދާއިންނާއި ހުރިހާ ފަރުދުންގެ ކަރާމާތަށްޓަކައި އެންމެބޮޑަށް ބާރުއަޅާކަމަކީ ހަމަހަމަކަންކަމަށާ އަދި ބައިބައިވުމަށް ފުރުޞަތެއް ނެތްކަމުގައި ނައިބު ރައީސް ވަނީ ވިދާޅުވެފައެވެ.

މި ހަރަކާތުގެ ހަވާސާގައި، ނައިބު ރައީސް ހުސެއިން ވަނީ އެހެން ޤައުމުތަކުގެ ޢިއްޒަތްތެރިންނާއި އ.ދ.ގެ އިދާރާތަކުގެ އިސްވެރިންނާއި ވެސް ބައްދަލުކުރައްވާފައިވެއެވެ.

ނައިބުރައީސް ގެ ދަތުރުފުޅު ނިންމަވައިލައްވައި މާލެ ވަޑައިގެންފައިވަނީ މިއަދުގެ ހެނދުނުގެ ވަގުތެއްގައެވެ.