އިސްލާމިކް މިނިސްޓްރީން ކުރިއަށް ގެންދާ އިސްލާމިކް ސޯޝަލް އިކޮނޮމީ ފޯރަމް(އައިއެސްއީއެފް) ފަށައިފިއެވެ.
މިކަމާއި ބެހޭގޮތުން އެ މިނިސްޓްރީން ބުނީ މި ފޯރަމް ކުރިއަށްދަނީ އިސްލާމީ މަރުކަޒުގެ ހޯލުގައި ކަމަށެވެ.
މި ފޯރަމްގައި އިސްލާމިކް މިނިސްޓަރު ޑރ.މުހައްމަދު ޝަހީމް އަލީ ސައީދުގެ ގެ އިތުރުން އެކިއެކި އިންސްޓިޓިއުޓްތަކުގެ އޮފިޝަލުން ވަނީ ބައިވެރިވެފައެވެ.
އައިއެސްއީއެފް ހުޅުވުމަށް މިނިސްޓަރ ދެއްކެވި ވާހަކަފުޅުގައި ވަޤުފުގެ މަޝްރޫޢުގެ މުހިންމުކަން ފާހަގަކުރެއްވިއެވެ. އަދި މާލޭ ސިޓީގައި ހުރި ވަގުފު ޕްރޮޕަޓީ "ދާރުލް އިމާން" އިން މިއަހަރު 6-7 މިލިއަން ރުފިޔާގެ އާމްދަނީއެއް ހޯދައިފައިވާތީ އެއީ ލިބުނު ކާމިޔާބީއެއް ކަމަށް ފާހަގަ ކުރެއްވިއެވެ. އިސްލާމީ އިޤްތިޞާދީ ތަރައްޤީއަށް ބާރުއަޅުއްވަމުން މިނިސްޓަރު ވަނީ ޚާއްޞަކޮށް ޒަކާތާއި ވަޤުފާއި ޙައްޖު ކޯޕަރޭޝަންއާއި ބެހޭގޮތުން ރައީސް ޑރ.މުޢިއްޒުގެ މެނިފެސްޓޯ ގައި ހިމަނާފައި ހުރި ކަންތައްތަކަށް އަލިއަޅުވާލައްވާފައެވެ.
އިސްލާމިކް ސޯޝަލް އިކޮނޮމީ ފޯރަމްގެ ޝަރަފުވެރި މެހެމާން މޯލްޑިވްސް އިސްލާމިކް ބޭންކުގެ ސީއީއޯ އަލްފާޟިލް މުފައްދާލް އިދްރީސް ޚުމްރީ އިސްލާމިކް ނިޒާމާއި އެ ނިޒާމު އުފެދުމުގެ ތަޢާރަފެއް ދެއްވާ، ވަޤުފާއި ބެހޭގޮތުން ވާހަކަފުޅު ދެއްކެވިއެވެ.
އޭގެތެރޭގައި، އޭގެ މުހިންމުކަމާއި، ފަންނާއި، ސަޤާފަތާއި، ޙަޟާރަތުގެ ތަރައްޤީއާ ގުޅުންހުރި މުހިންމު ކަންތައްތަކާއި ބެހޭގޮތުން ވާހަކަފުޅު ދެއްކެވުމުގެ އިތުރުން، ވަޤުފުގެ އަސްލު އުސްމާނީ ދައުލަތާ ހަމައަށް ހޯއްދަވައި، އިޖުތިމާޢީ ރައްކާތެރިކަމުގެ ގޮތެއްގެ ގޮތުގައި ވަޤުފުގެ ތާރީޚީ ދައރުރާއި ބެހޭގޮތުންވެސް އެބޭފުޅާ އަލިއަޅުއްވާ ލެއްވިއެވެ.
މިފޯރަމް ގައި މަޝްވަރާކުރުމަށް ހަމަޖެހިފައިވާ ކަންތަކުގެ ތެރޭގައި ޒަކާތު ފަންޑާއި، ހައްޖު ފަންޑާއި، އައުޤާފް ފަދަ ފަންޑުތައް ބޭނުންކުރުމާއި ތަރައްޤީވުން ހިމެނެއެވެ. އައިއެސްއީއެފްގެ މަގުސަދަކީ މި ފަންޑުތަކުގެ ސްޓްރެޓެޖިކް އެޕްލިކޭޝަނާއި، އަހަރުތަކުގެ ތެރޭގައި އެ ފަންޑުތަކުގެ ޓްރާންސްފޯމަޓިވް ދަތުރު ދިރާސާ ކުރުން ކަމަށް އިސްލާމިކް މިނިސްޓްރީން ބުނެއެވެ.
Advertisement
This content is created and paid for by advertisers and does not involve Voice Journalists
