ހުރަވީ ދުވަސް ފާހަގަ ކުރުމަށް ކުޑަކުދިންގެ ހަވީރެެއް ބޭއްވުމަށް ދިވެހި ބަހާއި ޘަޤާފަތާއި ތަރިކައާއި ބެހޭ ވުޒާރާއިން ނިންމައިފިއެވެ.

ހުރަވީ ދުވަހާއި ގުޅިގެން ބާއްވާ މި ކުޑަކުދިންގެ ހަވީރު އޮންނާނީ މާދަމާ ހަވީރު 4:00 ން 6:00 ހުޅުމާލެ ސެންޓްރަލް ޕާކުގައެވެ.

މިކަމާއި ބެހޭ ގޮތުން “ވޮއިސް” އަށް މަޢުލޫމާތު ދެއްވި އެމިނިސްޓްރީގެ މީޑިއާ ކޯޑިނޭޓަރ މުޙައްމަދު އަޙްސަން ވިދާޅުވީ މި ކުޑަކުދިންގެ ހަވީރުގައި ޅެންކިޔުމާއި، ރޯނުވެށުމާއި ބޮޑުބެރު ޖެހުން ފަދަ ދިވެހި ވަންތަ ހަރަކާތްތައް ކުރިއަށް ދާނެއެވެ.

މީގެ އިތުުރުން އަޙްސަން ވިދާޅުވީ މި ކުޑަކުދިންގެ ހަވީރުގައި ހުރަވީ ދުވަހާއި ގުޅޭ އާސާރީ ތަކެތި ކުޑަކުދިންނަށް ދައްކާލުން އޮންނާނެ ކަމަށެވެ.

ހަމައެހެންމެ ފޭސް ޕެއިންޓިން އާއި ކުލަޖެއްސުމާއި ކުޑަކުދިންނަށް ހަދިޔާ ދިނުންވެސް އޮންނާނެ ކަމަށް އޭނާ ވިދާޅުވިއެވެ.

އަޙްސަން ވިދާޅުވީ ހުރަވީ ދުވަހާއި ގުޅިގެން ޑިސެމްބަރު 17 އިން 21 އަށް ޤައުމީ ދާރުލް އާސާރުގައި ދޮންބާޑަރައިންގެ ހަނދާނީ މައުރަޒެއް އޮންނާނެ ކަމަށެވެ. އަދި މި މައުރަޒަކީ ދޮންބާޑަރައިންގެ ޖިހާދުގެ ޒިކުރާ އައު ކުރުމަށް ބާއްވާ މައުރަޒެއް ކަމަށެވެ.

ހުރަވީ ދުވަހުގެ ގޮތުގައި ފާހަގަ ކުރަނީ ހިޖުރީ ތާރީޚުން ޖުމާދިލްއާޚިރް މަހުގެ ތިންވަނަ ދުވަހެވެ.