ކުލަބު ޖީއެސްގެ ފަރާތުން އިންތިޒާމްކޮށްގެން ހއ.ހޯރަފުށީގައި މިހާރު ކުރިއަށްދާ "2 ވަނަ ޖީއެސް ވޮލީބޯޅަ ޓޯނަމަންޓް" ގައި މިއަދު ހަވީރު ކެލާ ކައުންސިލްގެ ޓީމާއި ޓީމު ހިޔާ ވާދަކުރި މެޗު، ފޯރިގަދަ ކުޅުމަކަށް ފަހު 3 ސެޓު 2 ސެޓުން ކެލާ ކައުންސިލްގެ ޓީމު ކާމިޔާބުކޮށްފިއެވެ.

ހޯރަފުށީ އައުޓްޑޯ ވޮލީބޯޅަ ކޯޓުގައި ކުޅުނު މިމެޗުގެ ފުރަތަމަ ސެޓުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މި ސެޓް 25-23 އިން ކަމިޔާބުކުރީ ޓީމު ހިޔާއެވެ. އަދި ދެވަނަ ސެޓް އެޓީމުން ކާމިޔާބުކުރީ ފަސޭހަކަމާއި އެކު 19- 25 އިންނެވެ.

ކެލާ ކައުންސިލްގެ ޓީމާއި ޓީމު ހިޔާ ވާދަކުރި މެޗުގެ ތެރެއިިން 

ނަމަވެސް މެޗުގެ ތިންވަނަ ސެޓުގައި ކެލާ ކައުންސިލްގެ ޓީމުން ވަނީ އެޓީމުގެ ކުޅުން ރަނގަޅުކޮށް އެޓޭކުތަކާއި ރިސީވްތައް ވެސް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މި ސެޓް އެ ޓީމުން ކާމިޔާބުކުރީ ވާދަވެރި ކުޅުމަކަށްފަހު 22-25 އިންނެވެ. އަދި މެޗުގެ ހަތަރުވަނަ ސެޓު ވެސް 22-25 އިން ކާމިޔާބުކޮށް އެޓީމުން ވަނީ މެޗުގެ ނަތީޖާ އެއްވަރުކޮށްފައެވެ.

މިއާއެކު މެޗުގެ ނަތީޖާ ނެރުމަށްޓަކައި ވަނީ 15 ޕޮއިންޓުގެ އިތުރު ސެޓެއް ކުޅެފައެވެ. މިސެޓު ދެބައިވީ އިރު 8-7 ން ކުރީގައި އޮތީ ޓީމު ހިޔާއެވެ. އަދި މި ސެޓުގައި 11-11 އިން ދެޓީމު އެއްވަރުވެފައި ވަނިކޮށް ކެލާ ކައުންސިލްގެ ޓީމުން ވަނީ ޖެހިޖެހިގެން 4 ޕޮއިންޓް ހޯދާ 15-11 އިން މިސެޓް ކާމިޔާބުކޮށްފައެވެ. 

ކެލާ ކައުންސިލްގެ ޓީމާއި ޓީމު ހިޔާ ވާދަކުރި މެޗުގެ ތެރެއިިން 

މިއާއެކު މެޗުގެ ކުޅުން ނިމިގެންދިޔައީ ތިން ސެޓު ދެ ސެޓުން ކެލާ ކައުންސިލްގެ ޓީމު ކުރީގައި އޮވެގެންނެވެ. އަދި މި މެޗުގެ މޮޅު ކުޅުންތެރިޔަކަށް ހޮވުނީ ކެލާ ކައުންސިލްގެ ޓީމު ކަވިޝްކާ މަދޫޝަންކާ އެވެ.

ކެލާ ކައުންސިލްގެ ޓީމު ކަވިޝްކާ މަދޫޝަންކާ

މި މުބާރާތަކީ ހޯރަފުށީގައި ވޮލީބޯޅަ ދިރުވައި އާލާކުރުމުގެ އިތުރުން ރަށުގެ ޒުވާނުންގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ މަގުސަދުގައި 2021 ވަނަ އަހަރު ހއ.ހޯރަފުށީގައި ހަރަކާތެރިވާ ކުލަބު ޖަމިއްޔާތަކާއި ސަރުކާރުގެ އޮފީސްތަކާއި، ސަރުކާރު ހިއްސާވާ ކުންފުނިތަކުގެ އިތުރުން އަމިއްލަ ކުންފުނިތަކާއި އަމިއްލަ ވިޔަފާރިތަކަށް ބައިވެރިވުމުގެ ފުރުސަތު ހުޅުވާލައިގެން ކުލަބު ޖީއެސް އިން ބާއްވަން ފެށި މުބާރާތެކެވެ.

ޗެންޕިއަން ޓީމަށް 25000 ރުފިޔާ އަދި ރަނައަޕް ޓީމަށް 10000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު ހަތަރު ޓީމު ބައިވެރިވެފައިވާއިރު، މި މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއް މެޗު ކުޅެ އެންމެ ގިނަ ޕޮއިންޓް ހޯދާ ދެޓީމު ފައިނަލަށް ހޮވޭގޮތަށެވެ.

މުބާރާތުގެ ޓައިޓަލް ސްޕޮންސަރ އަކީ ސޭލްސްކޯ ހާޑްވެއާ އެވެ. އަދި އޮފިޝަލް ކިޓް ސްޕޮންސަރަކަށް އެލިޓެޒް ޖާޒީ އެވެ. މީގެއިތުރުން މުބާރާތުގެ މީޑިޔާ ޕާޓްނަރަކަށް ހަމަޖައްސާފައި ވަނީ ވޮއިސް އެވެ.