އިސްރާއީލުގެ އަނިޔާވެރި ހަމަލާތަކާއި ކުރިމަތިލާންޖެހިފައިވާ ފަލަސްތީނުގެ ޣައްޒާގެ ރައްޔިތުންގެ މެދުގައި ނުރައްކާތެރި ބަލިތައް ފެތުރެމުންދާކަމަށް ބޭރު ދުނިޔޭގެ ޚަބަރުތަކުން ރިޕޯޓްކޮށްފިއެވެ.

މިހާތަނަށް އިސްރާއީލުގެ ބޮމާއި ވަޒަންތަކުން ވަށާލެވިފައިވާ ޣައްޒާގެ ރައްޔިތުންގެ ފަހަތުން ދުވަނީ ހިމޭން، ނުފެންނަ ޤާތިލެއް ކަމުގައިވާ ބަލިތަކެވެ.

ކާނާއާއި ސާފު ފެނާއި ބޯހިޔާވަހިކަމުން ލައްކައެއްހާ މީހުން މަހްރޫމްވެފައިވާއިރު، ނުރައްކާތެރި ބަލިމަޑުކަމެއް ފެތުރިދާނެ ކަމަށް ލަފާކުރެވޭ ކަމަށް ޣައްޒާގައި ހަރަކާތްތެރިވާ ޑޮކްޓަރުންނާއި އެހީތެރިންވަނީ އިންޒާރު ދީފައެވެ.

މިއަހަރުގެ ނޮވެމްބަރު 29 އިން ޑިސެމްބަރު 10 އަށް ބޭރަށް ހިންގުމުގެ މައްސަލަތައް ދިމާވެފައިވާ ފަސް އަހަރުން ދަށުގެ ކުދިންގެ އަދަދު 59،895 އަށް އަރާފައިވާއިރު، އާބާދީގެ އެހެން މީހުންނަށް މި ބަލި ޖެހިފައިވާ އަދަދު 55 ޕަސެންޓަށް ވުރެ މައްޗަށް އަރާފައިވާކަމަށް ދުނިޔޭގެ ސިއްހަތު ޖަމިއްޔާއިން ވަނީ ބުނެފައެވެ. އެހެންނަމަވެސް އދ.ގެ އެޖެންސީން ބުނީ ޣައްޒާގެ ހުރިހާ ނިޒާމަކާއި ހިދުމަތަކަށް މި ހަނގުރާމައިގެ ސަބަބުން ބުރޫއަރާފައިވާތީ ބަލިތައް ފެތުރޭ މިންވަރު ކަނޑައެޅިގެން ބުނަން ނޭނގޭ ކަމަށެވެ.

މީގެއިތުރުން އިސްރާއީލުގެ ހަމަލާތަކުގެ ސަބަބުން ގެދޮރު ގެއްލިފައިވާ ދިޔަ 1.9 މިލިއަން މީހުންނަށް ހިޔާތަކުގައި ތޮއްޖެހިގެން އުޅެން ޖެހުމުގެ ސަބަބުން ގިނަ ބަލިތަކެއް ފެތުރި، ތަފާތު ބަލިތަކެއްގެ 360،000 އެއްހާ ކޭސް ވަނީ ފެނިފައެވެ.

މިއަހަރުގެ އޮކްޓޫބަރު މަހުގެ 7 ވަނަ ދުވަހު ހައްދުފަހަނަ އަޅާފައިވާ އިސްރާއީލުން ޣައްޒާއަށް ދޭންފެށި ހަމަލާތަކުގައި މިހާތަނަށް 18،412 މީހަކު ޝަހީދު ކޮށްލާފައިވާއިރު، 50،000 ވުރެ ގިނަ މީހުން ވަނީ ޒަހަމްވެފައެވެ.