އަންނަ ޖެނުއަރީ މަހު ބޭއްވުމަށް ހަމަޖެހިފައިވާ 13 ރަށެއްގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ބައި-އިލެކްޝަންތަކުގެ ތެރެއިން 12 ރަށެއްގެ ގޮނޑިއަށް އިންތިޚާބަކާ ނުލައި މެންބަރުން ހޮވިއްޖެއެވެ.
އިލެކްޝަންސް ކޮމިޝަނުގެ ނައިބު ރައީސް އިސްމާއީލް ހަބީބު މިކަމާ ގުޅިގެން ވިދާޅުވެފައިވަނީ އަންހެނުންގެ ތަރައްޤީއަށް މަސައްކަތްކުރާ ކޮމިޓީ ބައި-އިލެކްޝަންގައި 12 ރަށެއްގެ ގޮނޑިއަށް އެންމެ ފަރާތަކުން ކުރިމަތިލާފައިވާތީ، އިންތިޚާބަކާނުލައި މެންބަރުން އިންތިޚާބުވެފައި މިވާ ރަށްރަށުގެ ބައި-އިލެކްޝަން ނުބާއްވާނެ ކަމަށެވެ.
"ޖެނުއަރީމަހުގެ 13 ވަނަ ދުވަހު ބާއްވަން ކޮމިޝަނުން އިޢުލާނުކުރީ 13 ބައި-އިލެކްޝަނެއް. އެ 13 ބައި-އިލެކްޝަނުގެ ތެރެއިން 12 ރަށެއްގެ ބައި-އިލެކްޝަނަށް އެންމެ ފަރާތަކުން ކުރިމަތިލާފައިވާތީ، ބައި-އިލެކްޝަން ނޯންނާނެ. އެ ފަރާތްތައް ވަނީ ހޮވިފައި."
ހަބީބް ވިދާޅުވިއެވެ.
އެހެންކަމުން ދެން އޮންނާނީ ހަމައެކަނި މ. މުލަކުގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީން ހުސްވެފައިވާ ގޮނޑިއަށް މެންބަރަކު އިންތިޚާބު ކުރުމަށް ބާއްވާ ބައި-އިލެކްޝަން އެކަނި ކަމަށާއި މި މަޤާމަށް ދެ މީހަކު ކުރިމަތިލައްވާފައިވާކަމަށް ޙަބީބް ވިދާޅުވިއެވެ.
އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ ބައި-އިލެކްޝަނަށް ހުޅުވާލި 18 ރަށުގެ ތެރެއިން، އެއްވެސް ފަރާތަކު ކުރިމަތިނުލައި ހުރި ރަށްތަކަކީ ރ. ރަސްގަތީމު، ބ. ކެންދޫ، އއ. ތޮއްޑޫ، ވ. ތިނަދޫގެ އިތުރުން މ. ރަތްމަންދޫ އަދި ފ. ބިލެތްދޫއެވެ.
މީގެ ތެރެއިން، ވ. ތިނަދޫގެ ކޮމިޓީއަށް 5 މެންބަރަކު އިންތިޚާބު ކުރުމަށް ހަމަޖެހިފައިވާއިރު، ދެން ކޮންމެ ރަށަކަށް އިންތިޚާބު ކުރާނީ އެންމެ މެންބަރެއްކަމަށް ޙަބީބް ވިދާޅުވިއެވެ. އަދި މި ރަށްރަށުގެ ހުސްވެފައިވާ ގޮނޑިތަކަށް ކުރިމަތިލުމަށް އަލުން އިޢުލާނުކުރައްވާނެކަމަށް ވެސް އޭނާ ވިދާޅުވިއެވެ.
އަންނަ އަހަރުގެ ޖެނުއަރީ މަހުގެ 27 ގައި ކައުންސިލްތަކުގެ ބައި-އިލެކްޝަންތައް ބޭއްވުމަށް އިލެކްޝަންސް ކޮމިޝަނުން ނިންމާފައިވާއިރު މި ބައި-އިލެކްޝަންގައި ވ. ރަކީދޫ، ފ. ދަރަނބޫދޫ އަދި ގދ. މަޑަވެލީގެ ހުސްވެފައިވާ ކައުންސިލަށް މެންބަރުން އިންތިޚާބު ކުރުމާއި، ބ. ފެހެންދޫ ކައުންސިލްގެ އަންހެނުންނަށް ޚާއްސަކޮށްފައިވާ ގޮނޑިއަށް މެންބަރަކު އިންތިޚާބުކުރުމަށް ހަމަޖެހިފައިވާކަމަށް ވެސް ޙަބީބު ވިދާޅުވިއެވެ.
ކައުންސިލް ބައި-އިލެކްޝަނަށް ކުރިމަތިލުމަށް، އިލެކްޝަންސް ކޮމިޝަނުން މިމަހުގެ 12 އިން 27 އަށް ވަނީ ހުޅުވާލާފައެވެ.
Advertisement
This content is created and paid for by advertisers and does not involve Voice Journalists
