ކުލަބު ޖީއެސްގެ ފަރާތުން އިންތިޒާމްކޮށްގެން ހއ.ހޯރަފުށީގައި މިހާރު ކުރިއަށްދާ "2 ވަނަ ޖީއެސް ވޮލީބޯޅަ ޓޯނަމަންޓް" ގައި މިރޭ ޓީމު ހިޔާ ފުރަތަަމަ ސެޓް ކާމިޔާބުކޮށްފައި ވަނިކޮށް ފަހަތުން އަރައި ތިން ސެޓު ކާމިޔާބުކޮށް 3-1 ގެ ނަތީޖާއަކުން މޮޅުވެ ޓީމު ހިޔާ އިން މުބާރާތުގެ ސެމީ ފައިނަލުގެ އުންމީދު ދަމަހައްޓައިފި އެވެ.

މުބާރާތުގައި ޓީމު ޕާމް އިން ކުޅުނު ފުރަތަަމަ މެޗުގައި ތިން ސެޓު އެއް ސެޓުން ކެލާ ކައުންސިލްގެ ޓީމު އަތުން މޮޅުވިއިރު، ދެވަނަ މެޗުގައި ޓީއޯ ސްޕޯޓްސް ކުލަބު އަތުން އެޓީމު މޮޅުވީ ސީދާ ތިން ސެޓުންނެވެ. އަދި މުބާރާތުގައި ޓީމު ހިޔާ އިން ކުޅުނު ފުރަތަމަ މެޗުގައި ތިން ސެޓު ދެ ސެޓުން އެޓީމު ވަނީ ކެލާ ކައުންސިލް އަތުން ބަލިވެފައެވެ.

ޓީމް ޕާމް އާއި ޓީމު ހިޔާ ވާދަކުރި މެޗުގެ ތެރެއިިން

މިރޭގެ މެޗުގެ ފުރަތަަމަ ސެޓުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިސެޓް 20-25 އިން ކާމިޔާބުކުރީ ޓީމް ޕާމް އެވެ. ނަމަވެސް ޖެހިގެންއައި ސެޓް ފޯރިގަދަ ކުޅުމަކަށް ފަހު 24-26 އިން ކާމިޔާބުކުރީ ޓީމް ހިޔާ އިންނެވެ. އަދި މެޗުގެ ތިންވަނަ ސެޓް 25-23 އިން އެޓީމު ކާމިޔާބުކުރިއިރު، ހަތަރު ސެޓް އެޓީމުން ކާމިޔާބުކުރީ 22-25 އިންނެވެ. މިއާއެކު މެޗުގެ ކުޅުން ނިމިގެންދިޔައީ ތިން ސެޓު އެއް ސެޓުން ޓީމު ހިޔާ ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ޓީމު ހިޔާގެ މުބައްޝަރު އެވެ.

ޓީމް ޕާމް އާއި ޓީމު ހިޔާ ވާދަކުރި މެޗުގެ ތެރެއިިން

މި މުބާރާތަކީ ހޯރަފުށީގައި ވޮލީބޯޅަ ދިރުވައި އާލާކުރުމުގެ އިތުރުން ރަށުގެ ޒުވާނުންގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ މަގުސަދުގައި 2021 ވަނަ އަހަރު ހއ.ހޯރަފުށީގައި ހަރަކާތެރިވާ ކުލަބު ޖަމިއްޔާތަކާއި ސަރުކާރުގެ އޮފީސްތަކާއި، ސަރުކާރު ހިއްސާވާ ކުންފުނިތަކުގެ އިތުރުން އަމިއްލަ ކުންފުނިތަކާއި އަމިއްލަ ވިޔަފާރިތަކަށް ބައިވެރިވުމުގެ ފުރުސަތު ހުޅުވާލައިގެން ކުލަބު ޖީއެސް އިން ބާއްވަން ފެށި މުބާރާތެކެވެ.

ޓީމު ހިޔާގެ މުބައްޝަރު 

ޗެންޕިއަން ޓީމަށް 25000 ރުފިޔާ އަދި ރަނައަޕް ޓީމަށް 10000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު ހަތަރު ޓީމު ބައިވެރިވެފައިވާއިރު، މި މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއް މެޗު ކުޅެ އެންމެ ގިނަ ޕޮއިންޓް ހޯދާ ދެޓީމު ފައިނަލަށް ހޮވޭގޮތަށެވެ.