ކުލަބު ޖީއެސްގެ ފަރާތުން އިންތިޒާމްކޮށްގެން ހއ.ހޯރަފުށީގައި މިހާރު ކުރިއަށްދާ "2 ވަނަ ޖީއެސް ވޮލީބޯޅަ ޓޯނަމަންޓް" ގައި މިރޭ ޓީއޯ ސްޕޯޓްސް ކުލަބާއި ދެކޮޅަށް ކުޅުނު މެޗު ސީދާ ތިން ސެޓުން ކާމިޔާބުކޮށް ލީގު ބުރުގެ އެއްވަަނަ ޓީމުގެ ގޮތުގައި ޓީމު ހިޔާ އިން މުބާރާތުގެ ފައިނަލުގެ ފުރަތަމަ ޖާގަ ކަށަވަރުކޮށްފިއެވެ.

މުބާރާތުގައި ޓީމު ހިޔާ އިން ކުޅުނު ފުރަތަމަ މެޗުގައި ތިން ސެޓު ދެ ސެޓުން ކެލާ ކައުންސިލްގެ ޓީމު އަތުން އެޓީމު ބަލިވި ނަމަވެސް ދެވަނަ މެޗުގައި އެޓީމުން ވަނީ ޓީމު ޕާމް އާއި ދެކޮޅަށް ކުޅުނު މެޗު ތިން ސެޓް އެއް ސެޓުން ކާމިޔާބުކޮށްފައެވެ. އަދި ޓީއޯ ސްޕޯޓްސް ކުލަބު މުބާރާތުގައި ކެލާ ކައުންސިލް އަދި ޓީމް ޕާމް އާއި ދެކޮޅަށް ކުޅުނު ދެ މެޗުން ވެސް އެޓީމު ބަލިވީ ސީދާ ތިން ސެޓުންނެވެ.

ޓީއޯ ސްޕޯޓްސް ކުލަބާއި ޓީމު ހިޔާ ވާދަކުރި މެޗުގެ ތެރެއިިން

މިރޭގެ މެޗުގެ ފުރަތަަމަ ސެޓް ފަސޭހަކަމާއި އެކު 13-25 އިން ޓީމު ހިޔާ ކާމިޔާބުކުރި ނަމަވެސް ދެވަނަ ސެޓްގައި ޓީއޯ ސްޕޯޓްސްގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިސެޓް ޓީމު ހިޔާ އިން ކާމިޔާބުކުރީ 22-25 އިންނެވެ. އަދި މެޗުގެ ތިންވަނަ ސެޓް އެޓީމުން ކާމިޔާބުކުރީ ފަސޭހަކަމާއި އެކު 14-25 އިންނެވެ. މިމެޗުގެ މޭން އޮފް ދަ މެޗަކަށް ހޮވިފައިވަނީ ހިޔާ ޓީމުގެ މުބައްޝަރު އެވެ.

މިރޭގެ މޮޅާއެކު ލީގު ބުރުގެ އެއްވަނަ ޓީމު ހިޔާ އިން ހޯދިއިރު، ދެވަނަ ލިބުނީ ޓީމް ޕާމް އަށެވެ. ލީގު ބުރުގެ ތިންވަނަ ކެލާ ކައުންސިލްގެ ޓީމު ހޯދިއިރު، ކުލުނު ތިން މެޗުން ވެސް ބަލިވެ، ލީގު ބުރުގެ ފުލަށް ދިޔައީ ޓީއޯ ސްޕޯޓްސް ކުލަބެވެ.

ޓީމު ހިޔާގެ މުބައްޝަރު 

މުބާރާތުގެ ފައިނަލްގެ ފުރަތަަމަ ޖާގަ ޓީމު ހިޔާއިން ކަށަވަރުކޮށްފައިވާ އިރު ފައިނަލުގެ ދެވަނަ ޖާގަ ލިބިގެންދާނީ މާދަމާ ރޭ 20:30 ގައި ކުޅެވޭ ސެމީފައިނަލް މެޗުގައި ކެލާ ކައުންސިލްގެ ޓީމާއި ޓީމް ޕާމް ވާދަކުރާ މެޗުން މޮޅުވާ ޓީމަކަށެވެ. އަދި މުބާރަތުގެ ފައިނަލް މެޗު ކުޅުމަށް ހަމަޖެހިފައިވަނީ މިމަހުގެ 19 ވަނަ ދުވަހުގެ ރޭ 20:30 ގައެވެ.

މި މުބާރާތަކީ ހޯރަފުށީގައި ވޮލީބޯޅަ ދިރުވައި އާލާކުރުމުގެ އިތުރުން ރަށުގެ ޒުވާނުންގެ މެދުގައި އެކުވެރިކަމާއި އެއްބައިވަންތަކަން އާލާކުރުމުގެ މަގުސަދުގައި 2021 ވަނަ އަހަރު ހއ.ހޯރަފުށީގައި ހަރަކާތެރިވާ ކުލަބު ޖަމިއްޔާތަކާއި ސަރުކާރުގެ އޮފީސްތަކާއި، ސަރުކާރު ހިއްސާވާ ކުންފުނިތަކުގެ އިތުރުން އަމިއްލަ ކުންފުނިތަކާއި އަމިއްލަ ވިޔަފާރިތަކަށް ބައިވެރިވުމުގެ ފުރުސަތު ހުޅުވާލައިގެން ކުލަބު ޖީއެސް އިން ބާއްވަން ފެށި މުބާރާތެކެވެ.

ޗެންޕިއަން ޓީމަށް 25000 ރުފިޔާ އަދި ރަނައަޕް ޓީމަށް 10000 ރުފިޔާގެ ފައިސާގެ އިނާމެއް ހުށަހަޅާފައިވާ މިމުބާރާތުގައި މިއަހަރު ހަތަރު ޓީމު ބައިވެރިވެފައިވާއިރު، މި މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ހަތަރު ޓީމުގެ މެދުގައި ލީގު އުސޫލުން ކޮންމެ ޓީމެއް ކޮންމެ ޓީމަކާއި އެއް މެޗު ކުޅެ އެންމެ ގިނަ ޕޮއިންޓް ހޯދާ ދެޓީމު ފައިނަލަށް ހޮވޭގޮތަށެވެ.