ރާއްޖޭން އިންޓަނެޓް މެދުވެރިކޮށް ލަދު ހުތުރު މަންޒަރު ތައް ބެލޭ ވެބްސައިޓް ތަކަށް ވަދެވެން ހުރި ހުރިހާ ދޮރެއްގައި މިސަރުކާރުން ތަންޑު އަޅުވާނެ ކަމަށް ރައީސުލް ޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ހުރަވީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން އެމަނިކުފާނު ވިދާޅުވީ މިހާރު އެމަސައްކަތުގެ ބޮޑު ބައެއް ވަނީ ނިމިފަ ކަމަށާއި ކުރިއަށް އޮތް ހަފްތާ ތެރޭގައި ރާއްޖޭން ލަދު ހުތުރު ވެބްސައިޓް ތަކަށް ނުވަދެވޭ ގޮތަށް އެފަދަ ވެބްސައިޓްތައް މުޅިން ބަންދުކޮށްލެވޭނެ ކަމަށެވެ.
މީގެ އިތުރުންވެސް ރައީސް ޑރ.މުއިއްޒު ވިދާޅުވީ ލަދު ހުތުރު މަންޒަރު ތައް ބެލޭ ވެބްސައިޓް ތަކަކީ ރާއްޖޭގައި ޒަމާނުއްސުރެ މިނެއްނެތި ހުޅުވާލެވިފައިވާ މައިދާނެއް ކަމަށެވެ.
ޒަމާނީ ދިރާސާ ތަކުން ކަށަވަރު ކުރާ ގޮތުގައި މިފަދަ މައިދާން ތަކަށް ދެވިހިފުމަކީ އިންސާނާގެ ސިކުނޑި ނިޒާމް ހަލާކުކޮށް، އޭނާގެ އުފެއްދުންތެރިކަން މަރާލާ، ނަފްސާނީ ބަލި މަޑު ކަމެއްގެ ތެރޭގައި މީހާ ޣަރަގު ކޮށްލާ ކަމެއް ކަމަށްވެސް އެމަނިކުފާނު ވިދާޅުވިއެވެ.
"ލަދު ހުތުރު މަންޒަރު ތައް ބެލޭ ވެބްސައިޓް ތަކަކީ ރާއްޖޭގައި ޒަމާނުއްސުރެ މިނެއްނެތި ހުޅުވާލެވިފައިވާ މައިދާނެއް. ދިވެހި ރާއްޖޭގެ ގާނޫނު މިކަން މަނާކުރޭ. މި ނާތަހުޒީބު ދޮރުތައް ބަންދުކުރަން ދިވެހިންގެ ގާނޫނާއި ދީން ވެރިޔާގެ މައްޗަށް ލާޒިމު ކުރޭ. "
ރައީސް ޑރ.މުއިއްޒު ވިދާޅުވިއެވެ.
މީގެ އިތުރުންވެސް މި ރަސްމިއްޔާތުގައި ވާހަކަފުޅު ދައްކަވަމުން އެމަނިކުފާނު ވިދާޅުވީ ވެރިޔާގެ ޒިންމާ އަކީ ރައްޔިތުންނަށް ދެދުނިޔޭގެ ބާއްޖަވެރިކަން ލިބޭނެ މަގު ފަހި ކޮށްދިނުން ކަމަށާއި އިރާދަ ކުރެއްވިއްޔާ އެގޮތުގައި ދެމި ހުންނާނެ ކަމަށެވެ. އަދި ދިވެހި މުޖުތަމައު ފަސާދަ ކުރާ ހުރިހާ އިޖުތިމާއީ ބަލި މަޑު ކަމެއްގެ ޖަރާސީމު ނައްތާލަން ގަދަ އަޅައި މަސައްކަތް ކުރައްވާނެ ކަމުގެ ޔަގީންކަން ވެސް އެމަނިކުފާނު ވަނީ ދެއްވާފައެވެ.
ރާއްޖޭގައި ބަރަހަނާ ސައިޓްތައް ބޭނުން ނުކުރެވޭހެން ބްލޮކް ކުރުމަށް މީގެ ކުރިންވެސް ގިނަ ބަޔަކު ގޮވާލި ނަމަވެސް މިއީ ސަރުކާރަކުން ރާއްޖޭގައި މިފަދަ ނިންމުމެއް ނިންމައި އެއަށް ޢަމަލު ކުރަން ފެށި ފުރަތަމަ ފަހަރެވެ.
Advertisement
This content is created and paid for by advertisers and does not involve Voice Journalists
