ތަހުޒީބާ ތަރައްޤީ އަކީ ތިމާއަށްވުރެ އިސްމީހުންނަށް ޤަދަރުކުރުން ކަމަށް ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ މުޢިއްޒު މިހެން ވިދާޅުވީ ހުރަވީ ދުވަހުގެ މުނާސަބަތުގައި ބޭއްވި ޖަލްސާ ޝަރަފުވެރިކޮށްދެއްވައި އެމަނިކުފާނު ދެއްކެވި ވާހަކަފުޅުގައެވެ.
ރައީސް ވިދާޅުވީ އެމަނިކުފާނު ދެކެވަޑައިގަންނަވާ ގޮތުގައި ދިވެހީންގެ ކިބައިގައި އިހު އޮތް ނަޒާހަތްތެރިކަމާއި އަމާނާތްތެރިކަމާއި މުރާލިކަމާއި މި ފަދަ ހުރިހާ މާތް ސިފަތަކެއް އަށަގެންނެވުމަށް ޓަކައި މަސައްކަތްތަކެއް ކުރަން ޖެހޭ ކަމަށެވެ.
“ދިވެހި ޤައުމަކީ އެކަކު އަނެކަކުގެ މައްޗަށް ކުލުނާއި އަގަލު ހުންނަ، ދުވަސްވީ މީހުންނަށް ކަމޭ ހިތާ، ތިމާއަށް ވުރެ އިސް މީހާއަށް ޤަދަރުކުރާ ޤައުމަކަށް ހެދުމަށް ވަރަށް ހިންމަތްކުރަންޖެހޭ ތަހުޒީބަކީ ތަރައްޤީއަކީ އެއީ”
ރައީސް ޑރ މުޙައްމަދު މުޢިއްޒު
ރައީސް ޑރ މުޢިއްޒު ވިދާޅުވީ މި ކަންކަން ކުރިޔަށް ގެންދެވޭނީ ދިވެހި ޤައުމިއްޔަތު އިޢާދަކުރެވިގެން ކަމަށެވެ. އަދި އެކަމުގެ ސަބަބަކީ އެއީ ހައްތަހާ ވެސް ދިވެހި ޤައުމިއްޔަތުގެ ސިފަތައް ކަމުގައި ވުމާއި، ޤައުމިއްޔަތުގެ ނާރެހަކީ ނުވަތަ މަދަކީ މާތްވެގެންވާ އިސްލާމްދީން ކަމަށް ވުމެވެ.
ރައީސް ވިދާޅުވީ ވެރިކަމުގެ ހުވާ ކުރެއްވެވި ދުވަހު އެމަނިކުފާނުގެ ހިންގުމުގެ ސިޔާސަތުތައް ޚިއްސާ ކުރެއްވެވި ކަމަށާއި، އެ ސިޔާސަތު ބިނާވަނީ އުމްރާނީ ބިނާކުރުމާއި އިންސާނީ ބިނާކުރުމުގެ މައްޗަށް ކަމަށް ދެންނެވިކަމަށެވެ.
ރައީސް ވިދާޅުވީ އިންސާނީ ބިނާކުރުމަކީ ސިކުނޑި ބިނާކުރުން ކަމަށެވެ. ހަމަމިއާއި އެކު ސިކުނޑި ބިނާކުރުމުގައި ޤައުމާ އެއްކޮޅަށް ހަރަކާތްތެރިވާ ނުވަތަ ޤައުމު ދެކެ ލޯބިވުމުގެ ފުން އިޙްސާސާ ގުޅިފައިވާ ސިކުނޑިތަކެއް ބިނާކުރައްވާނެ ކަމަށް ވިދާޅުވި ކަމަށްވެސް އެމަނިކުފާނުގެ ރޭގެ ވާހަކަފުޅުގައި ވިދާޅުވިއެވެ.
“މި ކަމުގައި ދައުލަތުގެ ހުރިހައި މުއައްސަސާއެއް ބައިވެރިވާނެ، ތިޔަ ލޮބުވެތި ދިވެހި ހުރިހައި ރައްޔިތުންގެ ތާއީދާއި އެހީތެރިކަމަށް އަޅުގަނޑު އެދުނިން، މިއަދު މި ވަގުތު ވެސް އެދެން، މިކަމާ ގުޅޭ ޚާއްޞަ މަޝްރޫޢު ކަމުގައިވާ ދިވެހި ޤައުމިއްޔަތު އިޢާދަކުރުމުގެ ޤައުމީ މަޝްރޫޢު އިރާދަކުރެއްވިއްޔާ ކާމިޔާބު ކަމާއެކީ ކުރިޔަށްދާނެ” ރަައީސް ވިދާޅުވިއެވެ.
މިއާއި އެކު ރައީސް ވިދާޅުވީ އެކަމަށް ޓަކައި ސަރުކާރުގެ ހަފުތާ 14 ތެރޭގައި ޤައުމީ ތަރިކަ ދިރާސާކުރާ މަރުކަޒަކާއި ޤައުމީ ތަރިކައިގެ ކޮލެޖެއް ހުޅުވޭނެ ކަމަށާއި، މަދުރަސާ ކުދިންގެ މަންހަޖުގެ ތެރެއަށް ޤައުމިއްޔަތުގެ ނަމުން، މާއްދާއެއް އިތުރުކުރެވޭނެ ކަމަށެވެ.
އަދި އެކަމުގެ ބޭނުމަކީ ދިވެހި ކުދީންނަށް ދެވޭ ތަޢުލީމަކީ ދިވެހިރާއްޖެއަށް ޓަކައި ދެވޭ ތަޢުލީމަކަށް ހެދުން ކަމަށާއި، ދިވެހި ދަރީން ބިނާކުރުމަށް ޓަކައި ދެވޭ ތަޢުލީމަކަށް ހެދުން ކަމަށް ރައީސް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
