ރިޔާސީ އިންތިޚާބުގެ ކެމްޕެއިންގެ ތެރޭގައި ވެވަޑައިގެންނެވި ވަޢުދާއި އެއްގޮތަށް ފައިސާ ޗާޕްކުރުން ހުއްޓައިލައިފައި ވާނެ ކަމަށް ރައީސް ޑރ މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މިހެން ވިދާޅުވީ ހުރަވީ ދުވަހުގެ ޝަރަފުގައި ބޭއްވުނު ރަސްމިއްޔާތުގައި ވާހަކަފުޅު ދައްކަވަމުންނެވެ.
ރައީސްގެ ވާހަކަ ފުޅުގައި ވިދާޅުވީ އެމަނިކުފާނު ދިވެހި ރައްޔިތުނަށް އަރުއްވާ ޔަޤީން ކަމަކީ އެމަނިކުފާނު ވެވަޑައިގެންނެވި ވަޢުދަތަކަށް އަމާނާތްތެރިވާނެ ކަމަށެވެ.
“ފައިސާ ޗާޕުކުރުން ހުއްޓާލާނެކަން އެއީ ވެސް އަޅުގަނޑުވީ ވަޢުދެއް، އަޅުގަނޑުމެން ސަރުކާރު ހިންގަން ފެށުމާއެކު ދައުލަތުން ފައިސާ ޗާޕުކުރުން ހުއްޓައިލައިފިން”
ރައީސް ޑރ މުޙައްމަދު މުއިއްޒު
ކޮވިޑްގެ ދުވަސްވަރު ރާއްޖެެއަށް ދިމާވި ދަތިކަމުގެ ސަބަބުން ސަރުކާރުގެ ޚަރަދުތައް ހަމަޖެއްސުމަށް ބޭނުންވާ ފައިސާ ޗާޕްކުރުމަށް ރައްޔިތުންގެ މަޖިލީހުން އެމްއެމްއޭއަށް ވަނީ ދީފައެވެ.
ނަމަވެސް މިސަރުކާރަށް ފެށުމާއި އެކު އެހުއްދަ އިތުރަށް ދިގުދެންމުމަށް ބޭނުން ނުވާކަން ފިނޭނެސް މިނިސްޓަރ ޑރ. މުހައްމަދު ޝަފީޤް ވަނީ ރައްޔިތުންގެ މަޖިލީހަށް އަންގަވައިފައެވެ.
މިނިސްޓަރުގެ މި ސިޓީގައި ވިދާޅުވެފައިވަނީ ދައުލަތުގެ ހަރަދަށް ޒިންމާވުމުގެ ޤާނޫނުގެ 36 ވަނަ މާއްދާގައި ބަޔާންކުރާ ފަދަ ހާލަތެއް މިހާރު ނެތުމުން އެ ގާނޫނުގެ 32 ވަނަ މާއްދާގެ ހ. ރ. އަދި ބ. އަށް ގެނެވުނު އިސްތިސްނާކުރުން އަންނަ އަހަރު ޖެނުއަރީ އެކަކުން ފެށިގެން ނިމުމަކަށް ގެނެސް އެ ޤާނޫނު ފުރިހަމައަށް އިޢާދަކުރުމަށެވެ.
Advertisement
This content is created and paid for by advertisers and does not involve Voice Journalists
